Царински инспектори следеле сомнителна пратка до Гостивар, ѝ влегле дома на студентка од Турција

При претрес на стан во Гостивар, во кој престојувала студентка, државјанка на Република Турција, инспектори од Одделението за истраги пронајдоа психотропни супстанци – метилендиоксиметамфетамин, мефедрон, марихуана и семки од канабис.

Претресот е извршен по налог од надлежното јавно обвинителство, при што се пронајдени шест таблети со вкупна тежина од 0,29 грама метилендиоксиметамфетамин, 1,63 грама мефедрон, марихуана и десет семки од канабис.

Во текот на предистражната постапка е утврдено дека осомничената студентка примила авионска пратка од Белгија, заведена како „нотес“. Откако ја отворила пратката и ја извадила дрогата, инспекторите веднаш извршиле претрес, по налог на јавен обвинител, при што биле пронајдени забранетите супстанци.

Со наредба на јавниот обвинител, запленетата дрога е испратена на вештачење во Министерството за внатрешни работи, каде е потврден нејзиниот хемиски состав.

Против студентката е поднесена кривична пријава до Основното јавно обвинителство Гостивар за кривично дело „Неовластено производство и пуштање во промет на наркотични дроги, психотропни супстанци и прекурсори“, казниво по член 215, став 1 од Кривичниот законик.

Share on Facebook

Tweet

Follow us

Save