Високи претставници на САД и ЕУ неделава во Скопје

Еврокомесарот за проширување Оливер Вархеји во рамки на неговата турнеја низ регионот која ги опфаќа и Хрватска, Бугарија и Албанија, утре ќе ја посети Северна Македонија.

Вархеји во Скопје ќе допатува од Софија каде што ќе има средби со претседателот Румен Радев, премиерот Кирил Петков и шефицата на дипломатијата Теодора Генчовска.

Во Софија тој денеска ќе учествува на конференција за зајакнување на регионалната соработка и интеграцијата во ЕУ, насловена „ЕУ се среќава со Балканот. Лекцијата од Украина: Европското проширување – заштита од војна“.

Еден ден по Вархеји, на 28 април, земјава ќе ја посети и помошник државната секретарка на САД за европски и евроазиски прашања Карен Донфрид во рамки на нејзината турнеја низ државите од Западен Балкан.

Како што соопшти Стејт департментот, Донфрид во Скопје ќе има средби со функционерите на Северна Македонија, при што ќе изрази силна поддршка за преговорите на земјата за влез во ЕУ и ќе се заблагодари за помошта за Украина.

Таа ќе ја повика Северна Македонија, како најнова членка на НАТО, да ја продолжат блиската соработка за низа регионални, безбедносни и одбранбени прашања за промовирање на демократијата и регионалната стабилност.

Дел од турнејата на Донфрид на Западен Балкан се и Албанија, Босна и Херцеговина, Црна Гора, Србија и Косово од каде на 25 април ќе ја започне посетата на регионот.

Share on Facebook

Tweet

Follow us

Save