„ВИНОВЕН СУМ, СЕ ИЗВИНУВАМ НА СЕМЕЈСТВОТО“: Пијаниот возач кој уби дете на пешачки во Велес призна вина, вo петок ќе добие казна

На денешното прво рочиште, Николов кажа дека е свесен за последиците од признанието, дека ќе добие затворска казна и дека ќе треба да плати отштета и трошоци.

Триесетгодишниот Ангелче Николов на денешното судење призна вина дека на пешачки во Велес ја усмрти 11 годишната Магдалена, а тешко ја повреди нејзината мајка во несреќата која се случи лани на 17 декември. В петок ќе му биде изречена казната на обвинетиот Николов.

Николов (30) на 17 декември, со уште неколку другари видени во неговото возило „мерцедес“, возејќи со голема брзина и пијан, на улицата „Борис Трајковски“ во близина на велешкото училиште „Васил Главинов“, на која е ограничено движењето на 30 километри на час, на пешачки премин удри во мајката и ќерката. Малата Магдалена од местото на ударот била отфрлена дваесеттина метри и веднаш починала. Нејзината мајка, која на пешачкиот премин била еден чекор понапред, тешко беше повредена.

„Признавам вина и му се извинувам и на семејството и на јавноста“, изјави пред судот Николов.

Обвинетиот избега и два дена се криеше, по што сам се предаде во полиција. Истражните органи го идентификуваа уште вечерта.

На денешното прво рочиште, Николов кажа дека е свесен за последиците од признанието, дека ќе добие затворска казна и дека ќе треба да плати отштета и трошоци.

Адвокатот на оштетеното семејство Јанаки Митровски побара од обвинителство да истражи кој го криел Николов два дена.

Николов претходно два пати бил казнуван за возење во алкохолизирана состојба.

фото: јутјуб/тв24/принтскрин

Share on Facebook

Tweet

Follow us

Save