„Неговата судбина не е позната“: Рускиот генерал Суровикин сменет од позицијата?

Рускиот генерал Сергеј Суровикин, заменик командант на руските сили во Украина, е сменет од таа позиција и неговата судбина не е позната.

Ова тврдење го изнесе портпаролот на украинската воена разузнавачка служба, Андриј Јусов.

Украинската воена разузнавачка служба коментира дека конфликтите во руската воена елита започнале по бунтот на групата „Вагнер“, при што Суровикин го загубил статусот, објави „Киев Индипендент“.

Без разлика, крајната судбина на Суровикин сè уште е непозната, додаде портпаролот.

Според Јусов, преструктуирањето на руското воено раководство е во корист на Украина и може негативно да влијае на моралот и воената ефикасност на руските трупи на долг рок.

Генералот Суровикин беше врховен командант во Украина се додека не беше заменет од началникот на Генералштабот Валериј Герасимов, а не е виден во јавноста по бунтот на „Вагнер“ против Кремљ на 23 и 24 јуни.

Киевскиот весник наведува дека Москва не ги потврдила овие тврдења.

Шефот на комитетот за одбрана на руската Државна дума, Андреј Картаполов, само коментираше дека Суровикин „моментално одмара“ и дека „засега е недостапен“.

Share on Facebook

Tweet

Follow us

Save