Полска: Белоруски хеликоптери влегоа во нашиот воздушен простор

Полска испрати дополнителни сили на својата источна граница откако ја обвини Белорусија, најблискиот сојузник на Русија, дека го нарушува нејзиниот воздушен простор со воени хеликоптери.

Војската на Белорусија негираше какво било нарушување на границата и ја обвини Полска, членка на НАТО и еден од најверните поддржувачи на Украина во нејзиниот конфликт со Русија, дека го измислила обвинението за да го оправда зголемувањето на бројот на своите војници.

Белорускиот лидер Александар Лукашенко претходно ја исмејуваше Полска за присуството на платениците на Вагнер во близина на нивната заедничка граница. Полското Министерство за одбрана соопшти дека испраќа „дополнителни сили и ресурси, вклучително и напаѓачки хеликоптери“.

Тие наведуваат дека го информирале НАТО за прекршувањето на границата и дека бил повикан белоруски дипломат да го објасни инцидентот. Полската армија првично негираше дека имало прекршување на границата. Сепак, по дополнителни консултации, тие потврдија дека упадот се случил „на многу мала надморска височина, тешко за пресретнување со радар“.

Белоруското Министерство за одбрана објави во објава на Телеграм дека Варшава се предомислила за инцидентот „по консултација со своите господари во странство“. „Оваа изјава не е поткрепена со податоци од Полска. Белоруското Министерство за одбрана гледа на тоа како на „бабини деветини“ и забележува дека хеликоптерите Ми-8 и Ми-24 не ја нарушиле границата“, велат тие.

Луѓето кои живеат околу селото Бјаловиежа во источна Полска, во близина на границата со Белорусија, проговорија на социјалните мрежи за инцидентот пред полското Министерство за одбрана да го објави своето соопштение. Патем, Белорусија му дозволи на рускиот претседател Владимир Путин да ја искористи нејзината територија за да изврши инвазија на Украина, но Лукашенко не ги ангажираше сопствените сили во војната.

Белорусија има долга историја на непријателство со Полска, како и Русија. Минатата недела Путин ја обвини Полска дека има територијални амбиции кон Белорусија и најави дека секој напад врз својот сосед ќе го смета за напад врз себе.

Претходно вчера, Лукашенко со потсмев и порача на Полска дека треба да му се заблагодарат што ги држи под контрола платениците на Вагнер, кои сега се стационирани во Белорусија по неуспешниот бунт против Кремљ минатиот месец.

Share on Facebook

Tweet

Follow us

Save