Турција го повика Иран да избегне понатамошна ескалација со Израел

Турција не сака понатамошна ескалација на тензиите во регионот по иранскиот напад со беспилотни летала и ракети врз Израел. Овој став му го пренел турскиот министер за надворешни работи Хакан Фидан на својот ирански колега во телефонски разговор на 14 април, јавува новинската агенција Ројтерс.

Иранскиот министер за надворешни работи Хосеин Амир-Абдолахиан одговорил дека иранската „одмаздничка операција“ против Израел заврши, додавајќи дека Иран нема да започне нова операција доколку не биде нападнат, велат турски дипломатски извори за Ројтерс.

Земјите ширум светот ги осудија нападите на Иран врз Израел доцна во саботата, предупредувајќи дека нападот се заканува дополнително да го дестабилизира Блискиот Исток.

Израел и неговите сојузници пресретнаа „огромно мнозинство“ од стотици беспилотни летала и проектили лансирани од Иран во текот на ноќта.

Силни експлозии и блесоци на светлина можеа да се видат на небото над многу делови на Израел во раните утрински часови на 14 април, додека противвоздушната одбрана на земјата се обидуваше да ги собори дојдовните беспилотни летала и проектили што Иран ги лансираше само неколку часа откако заплени брод поврзан со Израел во Ормускиот теснец.

Лидерите од Европската Унија и Обединетите Нации изразија сериозна загриженост од ескалацијата на тензиите и регионалната закана за безбедноста.

Американскиот претседател Џо Бајден вети „железна“ поддршка за Израел откако одржа итен состанок со највисоките безбедносни претставници. Тој во телефонскиот разговор со израелскиот премиер Бенјамин Нетанјаху истакна дека ги осудува иранските напади врз Израел.

Share on Facebook

Tweet

Follow us

Save