Liberte, egalite, fraternite, е*ете се!!!

Колку и да беше лош и неприфатлив договорот со Грција, фактот останува дека тука завршија грчките барања, за разлика од бугарските кои се окупаторски

„Новиот” француски предлог, кој е исто срање во различно пакување како и претходниот, пристигна во Владата вчера. Не беше веднаш даден на запознавање на македонската јавност, туку првично Владата го држеше дванаесет часа на консултации, оставајќи простор да се шират шпекулации и лажни вести.

Бугарската страна ја демантираше македонската Влада и порача дека нема ништо ново во предлогот.

На линија беа и од француската амбасада, кои зачудено реагираа зашто ова се толкува како изменет предлог кога, барем суштински е ист. Ако кажам дека ме боли шијата наместо ме боли вратот, точно е дека употребувам поинаков збор за предметот, ама суштината не е сменета.

Затоа, пак, дел од дежурните владини апологети, кои ни се оставштина уште од владеењето на СДСМ во деведесетите па преторијанската гарда на Груевски, побрза да не прекори и искара. Немало што да гледаме ние, за тоа требало да разговараат лидери.

ТУКА ЛЕЖИ ЗАЈАКОТ

Кои се тие лидери? Каде и кога е премиерот гласан? Каде и кога е Мицкоски гласан? Па и да се гласани, што со тоа? Во програмата им стоеше дека имаат право да решаваат за сите нас, без консултација и зад затворени врати??!! Е мало сутра!

До кога ќе не дијалектизираат, и до каде можеме да голтаме, е наградното прашање на денешницата. За мене лично, прагот е поодмана поминат.

Но пладнево, демек, модицифираниот предлог беше лиферуван во јавноста, по што се испостави дека лажните вести и не се толку лажни. Суштински ништо не се менува.

Се уште се остава да има фуснота дека Бугарија го смета македонскиот јазик за бугарски дијалект. И навидум тоа е можеби прифатливо. Бугарија може да си смета што сака, македонскиот јазик ќе биде официјален во ЕУ. Така? Не баш, и тука лежи зајакот.

Бугарија има и ќе има можност се до евентуален прием во ЕУ да рече, знаете што, сепак инсистираме да го признаете македонскиот јазик како бугарски, дека до 1944-та сте биле Бугари, и остали срања.

ОПАСЕН ПРЕСЕДАН

Досегашното однесување на Бугарија ми дава за право да се сомневам дека исходот ќе биде тој. Колку и да беше лош и неприфатлив договорот со Грција, фактот останува дека тука завршија грчките барања, за разлика од бугарските кои се окупаторски!

Дали ќе имаме обврска како држава да праќаме учебници на одобрување во Бугарија? Што е со т.н. говор на омраза кон Бугарија? Дали ќе се смета говор на омраза и вицеви ако раскажуваме за Бугари? И на крај, што е со историјата како крајно непотребен дел од целиот овој процес.

Македонија и Бугарија не се први земји кои претендираат на исти историски личности како свои, такви има и во самата ЕУ, па се досега не било случај да се користи како услов, создавајќи опасен преседан.

Предлогот дал е француски, дал е бугарски, за нас е неприфатлив. Франција има историја на давање поддршка на позиции кои се спротивни на нашите интереси.

Македонија мора овој предлог да го одбие ако сака да се депривира од задоволството на постојано изживување од страна на Бугарија. Liberte, egalite, fraternite, е*ете се!!!

Пишува Јанаки Митровски за Фокус