Авион полн со патници нагло се спуштил кај Сараево поради силни турбуленции, петмина се повредени

Пет лица се повредени откако патнички авион од типот „ербас А320“ на германската авиокомпанија „Еуровингс“ влетал во силна турбуленција во воздушниот простор во близина на Сараево, пренесе Авијација Хералд.

Според специјализиран воздухопловен портал, инцидентот се случил на 30 мај, за време на лет од Родос кон Келн. Авионот летал на височина од околу 10.970 метри кога добил одобрение да се искачи на повисоко ниво на лет.

Во истиот воздушен коридор пред него се движел „ербас А380-800“ на авиокомпанијата „Емирати“, кој летал од Дубаи кон Лондон.

За време на искачувањето, авионот на „Еуровингс“ ненадејно го прекинал маневарот и почнал нагло да се спушта. Според првичните информации, леталото влегло во комбинација од атмосферска турбуленција и силни воздушни вртлози што ги оставил поголемиот авион А380.

Во инцидентот полесно биле повредени четворица патници и една стјуардеса. Според извештаите, членката на кабинскиот персонал во најкритичниот момент била фрлена кон таванот на кабината.

Екипажот сепак го продолжил летот кон Келн, каде што по слетувањето биле подготвени медицински екипи. Повредените најпрво добиле помош во авионот, а потоа биле префрлени во болница на дополнителни прегледи.

Надлежните истражни служби ги презеле снимачот на разговорите во пилотската кабина и снимачот на параметрите на летот, за да ги утврдат точните околности на инцидентот.

Авионот на „Емирати“ безбедно го продолжил летот кон Лондон, додека леталото на „Еуровингс“ останало на земја во Келн околу четири и пол часа пред повторно да биде вратено во сообраќај.

Share on Facebook

Tweet

Follow us

Save