АНБ: Сериозниот финансиски и економски криминал и високата корупција, се едни од најсофистицираните и најопасни форми на поткопување на стабилноста на државата

Агенцијата за национална безбедност (АНБ) смета дека финансиската безбедност и борбата против високата корупција се прашање на национална безбедност затоа што, како што велат оттаму, сериозниот финансиски и економски криминал, како и високата корупција, претставуваат едни од најсофистицираните и најопасните форми на поткопување на стабилноста на државата, институциите и довербата на граѓаните и притоа како пример ги посочуваат предметот поврзан со сериозен финансиски и даночен криминал со значителна штета по државниот буџет, како и оној поврзан со сомнежи за висока корупција во правосудниот систем, во кој е пронајдена и одземена значителна парична сума.

-Современите безбедносни закани одамна не се ограничени само на класичните ризици по уставниот поредок или територијалниот интегритет. Денес, сериозниот финансиски и економски криминал, како и високата корупција, претставуваат едни од најсофистицираните и најопасните форми на поткопување на стабилноста на државата, институциите и довербата на граѓаните. Агенцијата за национална безбедност, покрај својата примарна улога во заштитата на националната безбедност, системски ги следи и анализира и појавите поврзани со организиран финансиски криминал, висока корупција и ризици по финансиската и институционалната стабилност на државата. Токму ваквиот пристап овозможува навремена детекција на сложени и често прикриени закани со сериозни долгорочни последици, се наведува во денешното соопштение од АНБ.

Како што велат од Агенцијата, во изминатиот период, преку засилени оперативни и аналитички капацитети, унапредена меѓуинституционална соработка и проактивен разузнавачки пристап, АНБ детектирала повеќе случаи со сериозни безбедносни и институционални импликации.

-Во таа насока, врз основа на информации на Агенцијата, надлежните институции постапуваат во предмет поврзан со сериозен финансиски и даночен криминал со значителна штета по државниот буџет. Паралелно со тоа, се постапува и во предмет поврзан со сомнежи за висока корупција во правосудниот систем, во кој е пронајдена и одземена значителна парична сума. Овие два предмета јасно покажуваат дека сериозниот финансиски криминал и високата корупција не се само прашање на поединечни кривични дела или буџетска штета, туку директна закана за институционалниот интегритет, владеењето на правото и безбедноста на државата, велат од АНБ.

Агенцијата за национална безбедност нагласува дека нејзината улога во ваквите случаи е навремено разузнавачко и аналитичко дејствување – препознавање на ризиците, нивна анализа и доставување на информации до надлежните институции, кои понатаму постапуваат согласно своите законски овластувања.

Share on Facebook

Tweet

Follow us

Save