Белорусија го прогласи Euronews за „екстремистички“ медиум

Министерството за информации на Белорусија ја прогласи веб-страницата на Euronews за „екстремистички материјал“ и ја стави на официјалната „Републичка листа на екстремистички материјали“.

Одлуката ја донел Окружниот суд во Хорки, во областа Могилев, на 4 август. Со тоа, пристапот до веб-страницата на Euronews во Белорусија ќе биде ограничен, а граѓаните би можеле да се соочат и со административни казни доколку „чуваат или дистрибуираат“ содржини од медиумот.

Euronews со години беше еден од главните европски извори на информации за публиката во Белорусија.

Одлуката предизвика реакција од уредничкиот директор на Euronews, Клаус Штрунц. Тој ја осуди одлуката, оценувајќи дека држава која независното и непристрасно новинарство го прогласува за „екстремистичко“ покажува страв од слободно известување.

„Нашата посветеност останува непроменета. Стоиме зад нашата публика во Белорусија и ќе продолжиме да обезбедуваме точни и независни информации“, порача Штрунц.

Белоруските власти засега не ги објавиле јавно образложението и причините за ваквата одлука.

Белорусија веќе го забрани телевизиското емитување на Euronews во 2021 година. Сега ограничувањето се проширува и на неговото дигитално присуство.

Со овој потег, Минск му се приклучува на Москва, која по почетокот на целосната инвазија врз Украина го блокираше телевизиското и дигиталното известување на Euronews во Русија.

Share on Facebook

Tweet

Follow us

Save