Вработените во Лувр повторно штрајкуваат поради лошите услови и недостиг на персонал

Музејот Лувр во Париз се соочува со уште еден штрајк на вработените, поради што најпосетуваниот музеј во светот денес е делумно затворен за посетители. Штрајкот, кој првично започна минатиот месец и беше суспендиран за време на празниците, продолжи откако вработените со огромно мнозинство гласаа да штрајкуваат во знак на протест поради лошите услови за работа, објави Euronews .

Одлуката беше донесена вчера по општ состанок свикан од синдикатите CFDT и CGT. Раководството на музејот објави дека музејот ќе остане делумно отворен, а посетителите ќе можат да пристапат до клучни дела како што се Мона Лиза, Венера де Мило и Крилестата победа од Самотрака.

Синдикатите предупредуваат на неколку клучни проблеми: хроничен недостиг на персонал, особено на надзорници на галерии, планирано зголемување на цените на билетите за 45 проценти за туристи од надвор од Европа и влошување на состојбата на зградата. Најочигледен пример за влошување е спектакуларниот грабеж на крунските скапоцености што се случи на 19 октомври минатата година.

Share on Facebook

Tweet

Follow us

Save