Зеленски: Подготвен сум да се сретнам со Путин

Зеленски синоќа ги повика меѓународните лидери да извршат притисок врз Москва. Во меѓувреме, рускиот претседател Владимир Путин отпатува во Кина на состанок на Шангајската организација за соработка (ШОС).

Зеленски рече дека разговарал со индискиот премиер Нарендра Моди, кој треба да се сретне со Путин на самитот во кинескиот град Тјенџин. Тој рече дека очекува Моди да се залага за прекин на огнот во конфликтот меѓу Украина и Русија, кој трае повеќе од три и пол години.

Украинскиот лидер повтори дека прекинот на огнот е предуслов за почеток на мировните преговори. Русија, од друга страна, вели дека сака да преговара за траен мир без претходно прекин на огнот. Во својата вечерна видео порака, Зеленски ја повтори подготвеноста на Украина да се сретне со Путин, и покрај обесхрабрувачките сигнали од Москва.

„Украинскиот преговарач Рустем Умеров одржа разговори во Турција, Обединетите Арапски Емирати, Саудиска Арабија и Катар. Сите се подготвени да организираат билатерален состанок, како и Швајцарија“, истакна Зеленски.

Тој, исто така, најави понатамошни состаноци во Европа следната недела за да се обезбеди „силен одговор“ на Москва, додека ЕУ подготвува 19-та рунда санкции против Русија.

Путин треба да присуствува на самитот на ШОС пред да ја гледа воената парада во Пекинг во среда. Според Кремљ, Путин треба да разговара во Кина со голем број лидери, вклучувајќи ги и оние од Индија, Турција, Иран, Србија и Пакистан.

Самитот, кој е закажан да се одржи на 31 август и 1 септември, ќе биде најголемиот откако е основан ШОС пред 24 години за борба против тероризмот и продлабочување на економската соработка, според Пекинг. Кина, моменталниот претседавач, очекува претставници од 20 земји и 10 организации.

ШОС сега има 10 земји-членки. Заедно со земјите-основачи Русија, Кина, Казахстан, Киргистан, Таџикистан и Узбекистан, во него се и Индија, Пакистан, Иран од 2023 година и Белорусија од 2024 година.

Share on Facebook

Tweet

Follow us

Save