Израел веќе не е сигурен дали нападите врз Иран ќе доведат до промена на режимот, нема назнаки за народно востание

Израел не е сигурен дали војната против Иран ќе доведе до соборување на неговата верска влада, изјавија израелски функционери за „Ројтерс“, додавајќи дека нема назнаки за народно востание во земјата.

И покрај изјавата на американскиот претседател Доналд Трамп дека војната може наскоро да заврши, проценката на Израел е дека Вашингтон не е блиску до наредба за завршување на конфликтот, изјавија двајца израелски претставници.

Во силните американско-израелски бомбардирања загинаа врховниот водач Али Хамнеи и голем број високи политички функционери и воени заповедници, но и стотици цивили. САД и Израел претходно ги повикаа Иранците да се кренат и да ја соборат власта.

„Нашата заедничка акција со САД ќе создаде услови храбриот ирански народ да ја земе својата судбина во свои раце“, рече израелскиот премиер Бенјамин Нетанјаху на денот кога почнаа нападите.

Тој им се обрати и на главните малцинства во Иран, Курдите, Белуџите и Арапите, велејќи дека САД и Израел можат да ги поддржат нивните востанија. Во својата вчерашна изјава, Нетанјаху повтори дека иако „желбата на Израел била да им помогне на Иранците да се ослободат од јаремот на тиранијата, на крајот, од нив ќе зависи“.

Израел и САД досега не излегоа со заедничка јавна изјава за јасни и обединети цели на војната, ниту, пак, ги истакнаа условите под кои би можеле да ја завршат воената кампања. Израелскиот министер за надворешни работи Гидеон Саар призна дека иранската влада би можела да ја преживее војната, но изрази увереност дека таа подоцна ќе се распадне.

Шефот на иранската полиција Ахмадреза Радан предупреди дека „секој што ќе излезе на улица по барање на непријателот, ќе биде сметан за непријател, а не за демонстрант“.

Иако многумина Иранци сакаат промени, а некои отворено ја славеа смртта на Хамнеи, чии безбедносни сили убија илјадници антивладини демонстранти пред само неколку недели, нема знаци на протест откако започна војната.

Share on Facebook

Tweet

Follow us

Save