INFOMAX.MK

Директорот на Фондот за здравствено осигурување, Сашо Клековски истакнува дека системот во земјава е инклузивен, сеопфатен и насочен кон тоа ниту еден граѓанин да не остане без здравствено осигурување. Тој посочува дека државата, како социјална, обезбедува покривање и за лицата без приходи, додека истовремено се спроведуваат повеќе реформи за унапредување и модернизација на системот.

„Системот на здравствено осигурување е вклучителен и сеопфатен

Македонија е социјална држава и приоритет е ниту еден граѓанин да не биде оставен без здравствено осигурување.

Во моментов, во државата има 1.836.667 осигуреници. Дури 470.774 лица или секој четврти граѓанин (25%) се осигурани по основ „лица без приходи“. За сите оние кои не можат да се осигураат по ниеден друг основ, државата целосно ги покрива трошоците преку програма на Министерството за здравство.

Три промени во тек

Фонд за здравствено осигурување Македонија и други институции работат на унапредување на системот преку три процеси:

-Правични критериуми: Заедно со МФ, МЗ и УЈП, ги дефинираме критериумите за лицата без приходи, со посебен фокус на оние кои останале без работа и спречување на злоупотреби од „сивата економија“.

-Грижа за најмладите: Во соработка со УНИЦЕФ, се анализираат можностите за независно здравствено осигурување за сите деца до 18 години.

-Модернизација на пазарот на труд: МСПДМ подготвува ново законско решение за опфат на лицата со флексибилни форми на работен ангажман.

Остануваме посветени на пристапен и правичен здравствен систем, базиран на реални анализи и одржливи решенија“, вели Клековски. објави Скопје1.мк