Кочани со тридневна комеморација ќе им оддаде почит на загинатите и ќе им се заблагодари на спасувачите

Општина Кочани подготвува низа активности за одбележување на првата годишнина од страотниот настан во клубот „Пулс“ кој се случи на 16 март 2025 година. Локалната самоуправа, во соработка со институциите и граѓанскиот сектор, најави достоинствена тридневна програма за сеќавање на жртвите, поддршка на повредените и изразување благодарност до сите кои помогнаа во најтешките моменти.

Сплотеност во организацијата Градоначалникот на Кочани, Владко Грозданов, на прес-конференција информираше дека програмата е внимателно подготвена од широк организациски одбор, во него, покрај Општината, членуваат и претставници на здружението „16 март 2025 Кочани“, Црвениот крст, Црквата, Болницата и Центарот за култура „Бели мугри“.

Тридневна програма (14 – 16 март)

Комеморативните активности ќе се реализираат во текот на три дена, при што секој ден има посебна намена и симболика:

14 март (Молитвено сеќавање): Првиот ден ќе биде посветен на православни содржини и молитвено сеќавање за упокоените во несреќата, со цел постигнување духовно единство.

15 март („Кочани Ви благодари“): Овој ден е посветен на преживеаните и на искажување благодарност кон сите здравствени установи, институции и поединци кои помогнаа младите да закрепнат. Општината ќе додели статуетки на благодарност на делегациите и здруженијата, по што ќе следи пригодна културно-уметничка програма како израз на надеж и заедништво.

16 март (Ден на трагедијата): Централниот ден е резервиран за мирно, достоинствено и сплотено оддавање почит на младите кои трагично ги загубија животите во дискотеката „Пулс“.

Повик до повредените да ги поканат своите спасувачи

Иако Општината веќе испратила официјални покани до здравствените установи, градоначалникот Грозданов упати посебен јавен апел до преживеаните млади луѓе директно да ги поканат лекарите кои се грижеле за нив.

„Ве охрабрувам сами да си ги поканите своите доктори и медицински крепители. Општина Кочани е овде и ќе ги удостои со топол и срдечен прием, ќе им обезбеди сместување и сите потребни почести“, истакна Грозданов.

Тој заклучи дека целта на ова одбележување не е само сеќавање на болката, туку отворање на ново поглавје во кое Кочани ќе прерасне во општина на сплотеност, истрајност и мир.

Share on Facebook

Tweet

Follow us

Save