„Кој е следен?“ најавува јавен онлајн состанок на кој ќе се разгледа претставката за случајот во Кочани

Граѓаните ќе можат директно да дадат мислење пред расправата за претставката на здружението „16-ти Март“ од Кочани.

Граѓанската иницијатива „Кој е следен?“ најави дека во сабота, 6 декември, во 18 часот ќе одржи јавен онлајн состанок, на кој ќе се соберат ставови, предлози и забелешки од јавноста. Целта е тие да бидат систематизирани и доставени до пратениците кои на 9 декември ќе присуствуваат на седницата на Постојаната анкетна комисија за заштита на слободите и правата на граѓанинот.

Повод за иницијативата е претставката поднесена од здружението на родители „16-ти Март“ од Кочани, кое бара утврдување политичка одговорност и измена на законските рамки со цел да се спречат идни трагедии налик на онаа што ги засегна нивните семејства. Комисијата ќе треба да ги разгледа наводите во претставката и да утврди дали постојат повреди на слободите и правата на граѓаните.

„Кој е следен?“ ги повикува сите заинтересирани граѓани да се вклучат во онлајн состанокот и да помогнат да се формулираат предлозите што ќе бидат презентирани пред народните избраници. Од иницијативата нагласуваат дека ваквиот процес придонесува за транспарентност, институционален надзор и засилено учество на јавноста во чувствителни општествени прашања.

Седницата на Комисијата е закажана за 9 декември 2025 година.

Share on Facebook

Tweet

Follow us

Save