Нивото на Рајна падна на најниско ниво од 1880 година

Нивото на реката Рајна падна на најниско ниво во последните речиси 150 години поради продолжените топлотни бранови и сушата во Европа. Ова претставува закана за сериозни нарушувања на еден од најважните транспортни коридори за јаглен, горива и индустриски производи во голем дел од континентот.

Во Кауб, клучна точка за бродовите кои пловат кон јужна Германија и Швајцарија, нивото на водата во понеделникот падна на само 24 сантиметри. Според податоците на германските федерални власти, обработени од Швајцарскиот федерален институт за технологија (ETH Zurich), ова е најниско ниво откако се водат мерења, односно од 1880 година.

Додека четвртиот топлотен бран ова лето во западна Европа продолжува, ризикот од логистички проблеми на реката долга околу 1.290 километри, која тече од швајцарските Алпи до Северното Море, сè повеќе се зголемува.

Поради падот на нивото на Рајна, цените за транспорт на стока веќе значително пораснаа, бидејќи бродовите мора да носат помалку товар за да можат да поминат низ плитките делови на реката.

Трошоците за транспорт на дизел од Ротердам до Карлсруе, подалеку низводно од критичната точка кај Кауб, достигнаа највисоко ниво откако Bloomberg почна да ги следи овие податоци во 2009 година.

Важно е да се напомене дека измереното ниво на водата е релативна вредност, односно се пресметува од фиксна референтна точка. Тоа не ја покажува вистинската длабочина на водата до дното.

Во Андернах, рекордното ниво од 24 сантиметри веќе било надминато во понеделникот попладне. Сепак, навечер нивото повторно се зголемило – од 23 на 28 сантиметри.

Во Вормс, нивото на водата моментално е само еден сантиметар над досега забележаното најниско ниво.

Кај Ремаген, најниското ниво од 7 сантиметри веќе било достигнато неколкупати, но сè уште не е надминато во негативна насока.

Според експерти, ваквото рано влошување на состојбата е невообичаено. Тоа го потврдува и германскиот Федерален институт за хидрологија.

Според нив, крајот на летото и есента обично се периоди кога нивото на водата е најниско. Фактот што веќе сега има толку малку вода во Рајна и другите реки претставува исклучителна ситуација.

Главните причини се сушата и високите температури, додека локалните врнежи можат да помогнат само привремено.

Share on Facebook

Tweet

Follow us

Save