INFOMAX.MK

Замрзнати коловози поради наглиот пад на температурите предизвикаа серија сообраќајни незгоди во северозападниот дел на земјата. На автопатот Тетово – Гостивар се случи верижен судир во кој учествуваа 10 возила, информира Центарот за управување со кризи.

– Од ПС за ВПС – Тетово се регистрирани четири сообраќајни незгоди со материјална штета. Две на автопатот Тетово – Гостивар – една верижна сообраќајна незгода со учество на 10 возила, потоа една на локалниот пат Пирок – Боговиње, една на патот Тетово – село Требош. За една од сообраќајните незгоди не е побаран увид. Од БПС – Гостивар се пријавени вкупно 15 сообраќајни незгоди, од кои на 10 е извршен увид од страна на увидна екипа, додека за пет не е побаран увид поради договор меѓу оштетените страни – појаснуваат од ЦУК.

Во регионот Тетово регистрирани се повеќе сообраќајки со материјална штета, додека во Гостивар се евидентирани 15 сообраќајни незгоди. Граѓаните масовно пријавувале замрзнати локални и споредни улици во Тетово, Гостивар и околните населени места.

– Регионалниот центар за управување со кризи – Тетово стапи во контакт со надлежните лица од општините Тетово, Гостивар и Желино, од каде беше потврдено дека се ангажирани фирми за зимско одржување и дека на терен се врши посолување на патиштата по приоритети. Пријави беа примени од населбите Фазанерија и Циглана во Гостивар, како и од селата Долна Ѓоновица и Корита. Од тетовскиот регион пријави имаше од село Селце – под Шар Планина и од повеќе улици во градот Тетово. Во Тетово беше активиран Кризниот штаб и извршено е посолување на повеќе локални патишта – додаваат од ЦУК.

По пријава за замрзнат коловоз на локалниот пат Желино – Сириќино, ЈКП „Желино“ интервенирало и извршило посолување на критичните делници.

– Од „Македонија пат“ – секциите Тетово, Попова Шапка и Гостивар, информираа дека континуирано се на терен и вршат посолување на автопатите и регионалните патни правци под нивна надлежност. Поради снежни врнежи, на патниот правец Лисец – Попова Шапка е воведена задолжителна употреба на зимска опрема. По 22:30 часот не се примени нови пријави од граѓани – додаваат од ЦУК.

Надлежните служби интервенирале со посолување на патиштата, а поради снежни врнежи на правецот Лисец – Попова Шапка е воведена задолжителна зимска опрема. Од ЦУК апелираат возачите да бидат крајно внимателни и да ја прилагодат брзината на условите на патот.