Пендаровски ги демантираше гласините за нова партија

Поранешниот претседател Стево Пендаровски ги отфрли информациите дека подготвува нов политички субјект и порача дека нема да формира нова партија. Тој оцени дека неговото име се користи во политичка пропаганда и дека во јавноста намерно се пласираат шпекулации со политичка позадина.

Реакцијата дојде откако во дел од медиумите се појавија тврдења дека Пендаровски наводно остварува средби и консултации за создавање нова политичка платформа за настап на следните избори. Токму на тие наводи тој возврати дека станува збор за шпекулација „излезена од лабораторијата на власта“, со која, според него, свесно се злоупотребува неговото име.

Целата приказна доби дополнителна тежина затоа што само неколку дена претходно Пендаровски испрати остра порака до раководството на СДСМ. Во таа изјава тој предупреди дека партијата се наоѓа на сериозен раскрсник и дека, без промена на политичката стратегија и без нови луѓе, може да стане маргинална.

Од СДСМ, пак, претседателот Венко Филипче возврати дека изјавите на Пендаровски биле извадени од контекст и дека тој, напротив, дава поддршка на тоа што го прави партијата. Филипче оцени дека околу ова се води координирана кампања против СДСМ и тврдеше дека нападите врз партијата доаѓаат од провладини медиуми.

Share on Facebook

Tweet

Follow us

Save