Пентагон: Чистењето на Ормускиот Теснец од мини може да трае шест месеци

Расчистувањето на морските мини поставени од Иран во Ормускиот Теснец би можело да трае и до шест месеци, според проценка на Пентагон презентирана пред американски конгресмени, што укажува дека економските последици од конфликтот меѓу САД и Иран може да се чувствуваат до крајот на годината или подолго, објави „Вашингтон пост“.

Оваа информација, споделена на доверлив брифинг пред Комитетот за вооружени сили на Претставничкиот дом, предизвикала незадоволство кај пратениците од двете партии, особено поради можноста цените на горивата да останат високи и по евентуален мировен договор.

Според извори запознаени со брифингот, Иран можеби поставил најмалку 20 мини во и околу теснецот, користејќи комбинација од далечински управувани уреди со џи-пи-ес и класични мини поставени од мали пловни објекти. Ова значително го отежнува нивното откривање и отстранување. Иако Пентагон јавно ги оспори овие информации, нарекувајќи ги неточни, призна дека темата била разгледувана зад затворени врати.

Ормускиот Теснец е клучна артерија за глобалната трговија со нафта, низ која пред војната поминувале околу 20 отсто од светските испораки, особено кон азиските пазари како Јапонија, Кина и Јужна Кореја. Неговото затворање или ограничување директно влијае врз глобалните цени на енергенсите. Во САД, цената на бензинот веќе порасна од околу 2,98 долари пред конфликтот на над четири долари по галон.

Политички, ова создава дополнителен притисок врз претседателот Доналд Трамп, чија одлука да влезе во војна со Иран не ужива широка поддршка и предизвика поделби дури и меѓу неговите гласачи. Во пресрет на изборите, економските последици од конфликтот може да имаат значајно влијание врз политичката сцена.

Иако Трамп тврди дека Иран веќе ги отстранува мините, други извештаи укажуваат дека Техеран можеби дури и не знае каде се поставени сите експлозиви. Во меѓувреме, американските сили продолжуваат со операции за уништување ирански пловни објекти за кои се сомнева дека поставуваат мини.

Експертите предупредуваат дека дури и делумно миниран теснец ќе ги обесхрабри бродските компании и осигурителите, што ќе доведе до намален сообраќај и до дополнителен раст на цените. Иако целосен прекин на сообраќајот е малку веројатен, ризикот останува доволно висок за да има сериозни последици врз глобалната економија.

Share on Facebook

Tweet

Follow us

Save