Повредениот Хамнеи е надвор од јавноста, но влијае на воената стратегија, проценуваат американските разузнавачки служби

Американските разузнавачки служби проценуваат дека новиот врховен лидер на Иран игра клучна улога во обликувањето на воената стратегија заедно со високи ирански функционери. Извештаите велат дека прецизната распределба на моќта во рамките на сега разединетиот режим останува нејасна, но дека Моџтаба Хамнеи веројатно ќе помогне во насочувањето на тоа како Иран ќе ги води преговорите со САД за завршување на војната.

Хамнеи не се појави во јавноста откако беше сериозно повреден во напад во кој беа убиени неговиот татко и неколку од врвните воени лидери во земјата на почетокот на војната, предизвикувајќи шпекулации за неговото здравје и улога во раководството на Иран, објавува Си-ен-ен.

Администрацијата на Трамп сè уште се обидува дипломатски да го заврши конфликтот додека примирјето трае повеќе од еден месец, а американските разузнавачки служби проценуваат дека Иран сè уште се опоравува од американското бомбардирање што остави значаен дел од воените капацитети на Иран недопрени и му овозможи да преживее уште неколку месеци од американската блокада.

Хамнеи беше прогласен за нов врховен лидер на Иран неколку дена по нападот во кој беше повреден, наследувајќи го својот татко, но американската разузнавачка заедница досега не можеше визуелно да ја потврди неговата локација. Дел од неизвесноста произлегува од фактот дека Хамнеи не користи електроника за комуникација, туку контактира само со оние кои можат лично да го посетат или да му испраќаат пораки преку курир.

Мазахер Хосеини, шеф на протоколот во канцеларијата на врховниот лидер на Иран, изјави во петокот дека Хамнеи се опоравува од повредите и сега е „целосно здрав“.

„Фала му на Бога, тој е во добра здравствена состојба“, им рече Хосеини на насобраните во Иран. „Непријателот шири секакви гласини и лажни тврдења. Тие сакаат да го видат и да го пронајдат, но луѓето треба да бидат трпеливи и да не брзаат. Ќе ви се обрати кога ќе дојде вистинското време.“

Иранскиот претседател Масуд Пезешкијан изјави за иранските државни медиуми претходно оваа недела дека имал состанок од два и пол часа со Хамнеи, првата објавена лична средба на висок ирански функционер со новиот врховен лидер на земјата.

Она што американските претставници го знаат за состојбата на Хамнеи се базира на информации собрани од луѓе кои комуницираат со него, велат извори запознаени со ситуацијата. Сепак, меѓу разузнавачките аналитичари постои сомневање дека некои во структурата на моќ во Иран можеби тврдат дека имаат пристап до Хамнеи за да го узурпираат неговиот авторитет и да ги унапредат сопствените интереси.

Војната ги ослабна воените капацитети на Иран, но не ги уништи. Си-ен-ен претходно објави дека американските претставници процениле дека околу половина од иранските ракетни лансери ги преживеале американските напади. Неодамнешен извештај го зголеми тој број на две третини, делумно затоа што времетраењето на примирјето му овозможи на Иран време да ги ископа лансерите што можеби биле закопани во претходните напади, според извори запознаени со проценките.

Во посебен извештај на ЦИА заклучено е дека Иран може да издржи уште четири месеци од американската блокада без целосно да ја дестабилизира економијата, велат изворите. „Вашингтон пост“ прв ја објави таа проценка на ЦИА. Американските и иранските воени сили разменија оган во последните денови и покрај прекинот на огнот, додека сообраќајот низ Ормускиот теснец е речиси запрен, а двете страни тврдат дека го контролираат тој воден пат.

Запрашан за проценката на ЦИА, висок разузнавачки службеник изјави за Си-Ен-Ен: „Блокадата на претседателот прави вистинска и растечка штета – ја прекинува трговијата, ги уништува приходите и го забрзува системскиот економски колапс. Иранската војска е сериозно ослабена, нејзината морнарица е уништена, а нејзините лидери се кријат. Она што останува е подготвеноста на режимот да го подложи сопствениот народ на страдање со цел да ја продолжи војната што веќе ја изгуби.“

Иако проценките на американските разузнавачки служби покажуваат дека Хамнеи е вклучен во обликувањето на преговарачката стратегија на Иран за дипломатски крај на војната, еден извор запознаен со најновите информации изјави за Си-Ен-Ен дека постојат докази дека тој е доста дистанциран од процесот на донесување одлуки и дека е достапен само повремено.

Share on Facebook

Tweet

Follow us

Save