Полскиот претседател собира политички поени на омраза кон Украинците, вели Зеленски

Украинскиот претседател Володимир Зеленски изјави дека полскиот претседател Карол Навроцки ги заострил односите со Украина поради внатрешнополитички причини, коментирајќи ја одлуката за одземање на Орденот на Белиот орел – највисокото полско државно одликување.

Во интервју за украинската телевизија ТСН, Зеленски оцени дека потегот на Навроцки е дел од политичката борба во Полска.

„Тоа го гледам исклучиво како дел од изборниот процес. Карол Навроцки се бори за позицијата на својата партија против премиерот Туск. Тоа нема никаква врска со нас, тоа е нивна внатрешна работа“, рече Зеленски.

Украинскиот претседател обвини дека Навроцки ја продолжува својата политичка кампања преку поттикнување негативни чувства кон Украинците.

„Тоа го правеше и Орбан. Тоа е лоша политика. Верувам дека лошо ќе заврши“, изјави Зеленски, додавајќи дека политички поени не можат долгорочно да се градат врз омраза бидејќи тоа води кон нарушување на односите меѓу народите.

Тој нагласи дека Украина во моментов ја брани Европа, вклучително и Полска, и оти двете земји мора да градат партнерски односи.

Спор околу историското наследство

Зеленски откри дека при нивната прва средба во Полска, Навроцки му подарил книга за Волинската трагедија – масовните убиства на Полјаци во Волин за време на Втората светска војна.

„Никогаш претходно не сум зборувал за тоа. Мирно живеев со тоа. Денес зборуваме отворено затоа што презема потези кои сметам дека се погрешни“, рече Зеленски.

Одземен Орденот на Белиот орел

Навроцки претходно одлучи да му го одземе на Зеленски Орденот на Белиот орел поради одлуката една украинска воена единица да го носи името на херој на Украинската востаничка армија (УПА).

Полскиот претседател тогаш порача дека Полска нема да поддржи членство во Европската Унија на држави кои не ја разбираат потребата од отфрлање на „култот на тоталитаризмот и насилството“.

По одлуката, украинскиот министер за надворешни работи Андриј Сибиха, украинскиот амбасадор во Полска Васил Боднар и шефот на кабинетот на украинскиот претседател Кирило Буданов соопштија дека ги враќаат полските државни одликувања што ги добиле.

Долгогодишен спор меѓу Киев и Варшава

Прашањето за Украинската востаничка армија останува едно од најчувствителните во односите меѓу Украина и Полска.

Во Украина, многумина припадниците на УПА ги сметаат за борци за независност, додека Полска ја обвинува организацијата за геноцид врз етничките Полјаци во Волин во периодот од 1943 до 1945 година.

Share on Facebook

Tweet

Follow us

Save