Поранешна асистентка на Епстајн: ги контролираше жените со манипулации, закани и финансиска зависност

Поранешна асистентка на осудениот сексуален престапник Џефри Епстајн во интервју за Би-Би-Си изјави дека американскиот финансиер со години воспоставувал целосна контрола врз жените преку психолошка манипулација, финансиска зависност, закани и изолација.

Жената, која зборува под псевдонимот Ања, го опиша системот што го изградил Епстајн како „култ“, во кој тој бил апсолутен лидер.

Според нејзините тврдења, по пресудата во 2008 година, Епстајн го променил начинот на кој ги регрутирал жртвите и почнал да се насочува кон млади полнолетни жени од Русија и Источна Европа, на кои им ветувал кариера во модната индустрија и деловни можности.

Ања тврди дека во кругот на Епстајн влегла преку агент за модели, по што тој постепено ја стекнал нејзината доверба, ветувајќи ѝ помош за манекенска кариера и организирајќи средби со луѓе од модниот свет.

Подоцна, како што наведува, Епстајн сексуално ја злоставувал, а откако станала негова асистентка, ја контролирал речиси секоја сфера од нејзиниот живот, вклучувајќи ги финансиите, сместувањето, контактите со други луѓе и пристапот до здравствена заштита.

Таа изјави дека асистентките биле достапни 24 часа дневно, живееле во станови што ги контролирал Епстајн и биле целосно зависни од него, додека сексуалното злоставување траело со години.

Ања дополнително тврди дека Епстајн собирал компромитирачки фотографии и снимки од жените и ги охрабрувал да пишуваат писма со благодарност, кои, според неа, служеле како уште еден механизам за контрола.

Според нејзиното сведочење, тој ги поттикнувал своите асистентки да регрутираат нови млади жени, а намерно создавал недоверба меѓу нив за да спречи меѓусебна поддршка.

Таа откри и дека Епстајн ја убедил да направи хируршка интервенција за отстранување тетоважа, која оставила трајни лузни, а подоцна барал и дополнителна операција бидејќи не бил задоволен од резултатот.

Дел од нејзините наводи ги потврдила и поранешната соработничка на Епстајн, Сара Келен, која претходно изјавила пред американски законодавци дека тој систематски им ја одземал способноста на жените самостојно да носат одлуки и ги правел зависни од него.

Џефри Епстајн почина во 2019 година во затвор во Њујорк, додека чекаше судење по обвиненија за трговија со малолетнички заради сексуална експлоатација. Ања и Келен подоцна добиле обештетување од фондот за жртви формиран по неговата смрт.

Share on Facebook

Tweet

Follow us

Save