Почина легендарниот Алекс Занарди, еден од најголемите спортски херои
Светот на спортот се збогува со Алекс Занарди, поранешен возач на Формула 1 и повеќекратен параолимписки шампион, кој почина на 59-годишна возраст.
Занарди беше дел од Формула 1 во текот на 1990-тите, натпреварувајќи се за тимовите на Џордан, Минарди, Лотус и Вилијамс, со вкупно 41 трка. Неговиот најзначаен период беше во болидот на Лотус во 1993 и 1994 година, кога го постигна најдобриот резултат во кариерата – шесто место на Големата награда на Бразил.
Иако не остави длабока трага во Формула 1, тој стекна светска слава во Американското првенство ИндиКар, каде што освои две титули. Сепак, неговата кариера и живот беа обележани со несреќа во 2001 година на патеката Лаузицринг во Германија, во која ги загуби обете нозе.
Наместо крај, тој момент стана почеток на нова, уште помоќна приказна. Занарди се врати на трките во 2003 година, во специјално адаптиран болид, натпреварувајќи се во шампионатот за туристички автомобили, каде што повторно успеа да се искачи на подиумот.
Паралелно, тој се сврте кон паравелосипедизам, во кој го достигна својот врв – на Параолимписките игри во 2012 и 2016 година освои четири златни и два сребрени медали, потврдувајќи го својот статус како еден од најголемите спортисти во историјата на параолимпиското движење.
Судбината не беше благонаклонета кон него ниту во подоцнежните години. Во 2020 година, Занарди беше сериозно повреден во сообраќајна несреќа во Италија додека возел рачен велосипед, по што долго време се опоравуваше.
