САД бараат Иран да гарантира слобода на навигација низ Ормутскиот теснец

Иранскиот министер за надворешни работи пристигна во Оман за да разговара за аранжманите за безбедно минување на бродовите низ Ормутскиот теснец, објавија иранските државни медиуми, додека Вашингтон бара јавна гаранција за слободен и безбеден транзит, објави Ројтерс.

Американскиот претседател Доналд Трамп изјави дека Вашингтон и Техеран се согласиле да продолжат со разговорите и покрај ескалацијата на непријателствата оваа недела, а воедно објавија и крај на сегашниот прекин на огнот. Не беа пријавени нови напади во петокот или саботата навечер.

Оман посредува во обидите за завршување на конфликтот, кој ја потресе безбедноста во Персискиот Залив и ги зголеми цените на нафтата откако започнаа воздушните напади на САД и Израел врз Иран на 28 февруари.

Според Си-Би-Ес њуз и Би-Би-Си, се очекува потпретседателот Џ.Д. Венс, државниот секретар Марко Рубио, специјалниот пратеник Стив Виткоф и Џаред Кушнер да учествуваат во разговорите.  Ројтерс не можеше да ја потврди информацијата, а новинската агенција Фарс подоцна, повикувајќи се на извор, објави дека нема да има разговори сè додека САД не го променат својот став.

Арагчи го обвини Вашингтон за кршење на договорот за прекин на огнот откако САД ја одзедоа лиценцата за продажба на иранска сурова нафта. „Може да има само взаемно почитување“, напиша тој во X.

Порано оваа недела, три катарски и саудиски комерцијални танкери беа нападнати , што доведе до американски напади врз ирански цели и одмазда од страна на Техеран против американските воени бази во Персискиот Залив. Иако Иран не ја презеде одговорноста за нападите врз бродовите, аналитичарите веруваат дека ваквите акции имаат за цел да ја зајакнат неговата преговарачка позиција. 

Трамп напиша на Truth Social: „Исламската Република Иран нè замоли да ги продолжиме „разговорите“. Се согласивме да го сториме тоа, но САД недвосмислено им кажаа дека прекинот на огнот е завршен!“ Иран негираше дека бара разговори со САД, велејќи дека прифатил само посредништво на Катар. Според извор на Ројтерс, претставниците на Катар разговарале со иранските претставници за деескалација и Ормутскиот теснец.

Американскиот претседател, исто така, предупреди дека ѝ наредил на војската да биде подготвена да го нападне Иран во случај на обид за атентат врз него. „1.000 ракети се наполнети и насочени кон Исламската Република Иран, а уште илјадници ќе следат веднаш доколку иранската влада дејствува врз основа на својата закана, упатена во многу делови од светот, за атентат или обид за атентат врз актуелниот претседател на Соединетите Американски Држави, во овој случај МЕНЕ!“, напиша тој.

Американските медиуми објавија дека Израел му доставил на Вашингтон разузнавачки информации за наводен ирански заговор за атентат врз Трамп . Иран не ги коментираше извештаите. На погребот на ајатолахот Али Хамнеи, кој беше убиен во воздушен напад на првиот ден од војната, некои присутни носеа транспаренти на кои пишуваше „Ќе го убиеме Трамп“.

Вашингтон побара Иран да се обврзе да ги прекине нападите врз бродовите и да овозможи непречен премин низ Ормускиот теснец без патарини . За време на конфликтот, Техеран во голема мера воспостави контрола врз теснецот, кој пред војната пренесуваше околу една петтина од светските залихи на нафта.

Според иранското Министерство за здравство , најмалку 17 лица беа убиени, а 115 повредени во американските напади врз шест ирански градови. Сепак, американските претставници ги опишаа контактите меѓу двете земји во последните денови како продуктивни. Техеран предупреди дека секое кршење на обврските од страна на САД ќе биде одговорено со „реципрочна акција“.

Привремениот договор од минатиот месец требаше да го отвори патот за завршување на конфликтот, кој сега е во петтиот месец, во кој загинаа илјадници луѓе, се прекина снабдувањето со енергија и се зголеми стравот од глобален економски пад. Новите тензии во Персискиот Залив доведоа и до најголем неделен пораст на цените на нафтата во последните осум недели.

Share on Facebook

Tweet

Follow us

Save