Серхио Рамос ја купува Севилја за 450 милиони евра
Легендарниот шпански фудбалер, Серхио Рамос, е на чекор до историски подвиг. По завршувањето на неговата богата активна кариера, дефанзивецот се враќа во својот матичен клуб, Севилја, но овојпат во сосема поинаква улога – како негов ко-сопственик и главен инвеститор.
По повеќемесечни интензивни преговори со мнозинските акционери на „Санчез Пижуан“, групацијата „Five Eleven Capital“, предводена токму од Рамос, конечно постигна целосен договор за преземање на реномираниот шпански колектив. Рамос и неговите бизнис-партнери ќе платат вкупно 450 милиони евра за да го преземат раководењето со седумкратниот освојувач на Лигата на Европа.
Според договореното, со овие средства прво ќе бидат целосно подмирени долговите кои клубот ги акумулираше во изминатиот период, додека остатокот од сумата ќе биде распределен меѓу досегашните сопственици, соодветно на нивниот број на акции.
Иако сите детали се веќе прецизирани, исплатата на средствата треба да се реализира најдоцна до 31 мај. Сепак, во договорот е вметната специфична заштитна клаузула: доколку Севилја не успее да обезбеди опстанок во Примера дивизион, вкупната сума на купопродажбата останува иста, но рокот за конечна исплата автоматски ќе биде продолжен за една година.
За оваа голема трансакција да стане официјална, преостанува само уште административната потврда од Високиот спортски совет (CSD) во Шпанија. Се очекува ова да биде само чиста формалност, по што Серхио Рамос и официјално ќе ја започне својата нова ера како прв човек на андалузискиот гигант.
Ова преземање се смета за еден од најзначајните моменти во поновата историја на клубот, со оглед на емотивната поврзаност на Рамос со Севилја и неговата амбиција да го врати тимот во самиот врв на шпанскиот и европскиот фудбал.
ПОВРЗАНИ ВЕСТИ
Серхио Рамос ја купува Севилја за 450…
Легендарниот шпански фудбалер, Серхио Рамос, е на…