Словенка починала по липосукција во Истанбул: Крварела, барала помош, ѝ рекле дека „сето тоа е нормално“

Словенка на 44-годишна возраст од Словењ Градец починала во Турција на почетокот на јануари, откако била подложена на естетска хируршка интервенција, а нејзиното тело во вторникот било пренесено во Словенија, објави „Газета експрес“.

Таа починала по липосукција извршена во Истанбул, каде што заминала во средината на декември, главно затоа што зафатот бил значително поевтин отколку во Словенија.

Патувањето и операцијата ги организирала преку агенција што ја пронашла на интернет. Според достапните информации, агенцијата била задолжена за целата организација – од превоз од аеродром и хотелско сместување, преку комуникација со клиниката, па сè до враќањето дома.

Во Љубљана била извршена обдукција за да се утврди точната причина за смртта. Како можна компликација неофицијално се споменува белодробна емболија, но официјалните резултати сè уште не се објавени.

Словенечката полиција, во соработка со Интерпол, побарала информации од турските власти, но досега добила само оскудни и нецелосни податоци за тоа кои медицински постапки биле извршени и по кој редослед.

Не ја сфаќале сериозно

Според семејството, здравствената состојба на жената почнала да се влошува веднаш по операцијата, додека престојувала во хотел. Таа се жалела на сериозни симптоми, меѓу кои крвавење и општа слабост, и повеќепати контактирала со клиниката. Сепак, според нејзините блиски, предупредувањата не биле сфатени доволно сериозно. Единствената личност со која можела да комуницира била преведувач кој зборувал хрватски, а кој ѝ рекол дека лекарите ја сметаат таквата состојба за „нормална“ по интервенцијата.

Четири дена по операцијата таа доживеала срцев застој, наводно како последица на белодробна емболија. Кога состојбата нагло ѝ се влошила, се обидела да се јави на единствениот број за помош, но преведувачот не одговорил речиси еден час подоцна, по што контактот бргу бил изгубен. Не е јасно кој ја пронашол и колку време поминало пред да биде пренесена во друга болница, бидејќи клиниката во која била оперирана немала оддел за интензивна нега.

Во другата здравствена установа лекарите ја реанимирале околу половина час, ја интубирале и ја приклучиле на апарат за вештачко дишење. И покрај сите напори, таа починала десет дена подоцна, на 2 јануари. Министерството за надворешни и европски работи на Словенија ја потврдило смртта на словенечката државјанка во Турција, но не соопштило дополнителни детали.

Темната страна на евтината естетска хирургија

Сомневајќи се дека реакцијата на здравствените институции не била навремена или соодветна, семејството побарало правна помош во Турција, а случајот го истражуваат и надлежните органи таму. Полицијата во Цеље потврдила дека учествува во меѓународната размена на информации, но сè уште чека одговор од турските власти.

Случајот повторно го отвори прашањето за безбедноста на естетските зафати во странство, особено во Турција, која поради пониските цени стана една од водечките дестинации за медицински туризам во светот. „Ол инклузив“ пакетите за липосукција, кои вклучуваат операција, хотел, превоз и преведувач, чинат околу 4.000 евра, но експертите предупредуваат дека пониската цена честопати значи и поголем ризик.

Секоја година Универзитетскиот клинички центар во Љубљана лекува сè повеќе пациенти со компликации по естетски зафати извршени во странство. Најчести се инфекциите, проблемите со зараснување на раните и оштетувања на ткивото, а во потешки случаи и сепса и животозагрозувачки состојби. Лекарите велат дека генерално не ги препорачуваат ваквите интервенции.

Трагичната смрт на оваа словенечка државјанка е уште едно предупредување за темната страна на евтината естетска хирургија во странство, чии последици понекогаш стануваат видливи дури кога е предоцна.

Share on Facebook

Tweet

Follow us

Save