Србија: Договорите од Кина носат една милијарда евра нови инвестиции и 1.650 работни места

Министерката за внатрешна и надворешна трговија на Србија, Јагода Лазаревиќ денес изјави дека, врз основа на договорите потпишани од српската делегација во Кина, во Србија доаѓаат речиси милијарда евра нови инвестиции и се создаваат повеќе од 1.650 нови работни места.

Лазаревиќ нагласи дека Кина е галопирачка економија и дека Србија, градејќи добри економски и политички односи со неа, може да го искористи ова.

„Ова е нешто што ние, како земја која има извонредни политички односи и исклучително развиена економска соработка со Кина, особено сега по оваа посета и сè што се случи таму и беше склучено и договорено, навистина можеме да го искористиме“, изјави таа за РТС.

Таа додаде дека во официјалниот дел во присуство на двајцата претседатели биле потпишани 23 договори, како и уште десет што биле потпишани за време на остатокот од посетата со кинеските претставници, кои опфаќаат клучни области на соработка меѓу двете земји и даваат важна правна основа за понатамошен развој на соработката.

„Од друга страна, економскиот дел, деловниот дел од посетата што ја имавме, како и фактот дека делегацијата се сретна со 29 компании и во таа прилика беа потпишани важни договори што директно се однесуваат на доаѓањето на нови инвестиции, нови работни места – вкупно 1.650 нови работни места ќе бидат отворени врз основа на овие договори и речиси милијарда евра нови инвестиции. Структурата на инвестициите и областите во кои ќе се развиваат овие проекти се токму од стратешки интерес – мислам првенствено на автомобилската индустрија и употребата на нови технологии“, рече таа. Како што наведе, Кина во моментов е доминантен светски извозник за 315 категории на производи.

„Како толку сериозен играч и инвеститор во пораст, таа е партнер што само би можеле да го посакате. И нивното присуство тука и фактот дека голем број работници во моментов се вработени од кинески компании се работи што се конкретни, мерливи и од исклучително значење за развојот на специфични региони на Србија, што е апсолутно важно за нас“, заклучи Јагода Лазаревиќ.

Share on Facebook

Tweet

Follow us

Save