Трамп ја одложува воената помош за Украина, Зеленски останува без 400 милиони долари

Администрацијата на американскиот претседател Доналд Трамп го извести Конгресот дека не планира да ја заврши исплатата на 400 милиони долари воена помош за Украина пред фискалната 2029 година.

Писмо со таков план за трошење, како што наведува Ројтерс, Министерството за одбрана им испратило на конгресмените уште во мај, а демократите и дел од републиканците на Трамп го критикуваат Пентагон поради одложување на помошта – која двете партии ја одобрија минатата година.

Според изворот на кој се повикува Ројтерс, два месеца по испраќањето на писмото, средствата сè уште не се ни распределени, ниту договорени.

Конгресот повеќепати изрази незадоволство од бавното темпо на трошење на парите, а за постоењето на ова писмо досега не се знаеше јавно.

Според планот за испорака, средствата ќе се доделуваат во текот на фискалната 2026 година, која завршува на 30 септември, додека конечната испорака на целиот пакет е предвидена за фискалната година која завршува на 30 септември 2029 година.

Ројтерс потсетува дека вториот претседателски мандат на Доналд Трамп истекува на 20 јануари 2029 година.

Украинскиот претседател Володимир Зеленски денеска би требало да се сретне со Трамп во Белата куќа. Извор запознаен со плановите за средбата вели дека Зеленски ќе продолжи да инсистира на итна испорака на системи за ПВО и на постигнување договор за беспилотни летала.

По средбата со претседателот, Зеленски планира да го посети Капитол и да се сретне со сите 100 сенатори.

Американскиот претседател неодамна покажа поотворен став кон Украина. Го одобри предлогот на Киев да му се додели лиценца за производство на ракети-пресретнувачи за системот Патриот (Patriot) и најави дека ќе го потпише законот за санкции против Русија.

Тој закон го предложи покојниот републикански сенатор Линдзи Греам, еден од најблиските сојузници на Трамп во Сенатот.

Изненадната смрт на Греам претходно овој месец го отвори прашањето дали пресвртот на Трамп во корист на Киев ќе продолжи без неговата поддршка, посебно кога станува збор за санкциите против Русија и воената помош за Украина.

Членовите на Конгресот ѝ изразија загриженост на администрацијата поради бавното финансирање на Украина.

На минатонеделните сослушувања, демократскиот сенатор Дик Дарбин му постави прашање за планот за трошење на министерот за одбрана Пит Хегсет и на началникот на Здружениот генералштаб, генерал Ден Кејн.

Дарбин постави прашање како американската помош воопшто може да ѝ помогне на Украина ако испораката на таа иста помош толку се одложува.

Пентагон минатата година неколку пати ја обустави испораката на оружје, а како причина беше наведена загриженоста дека американските залихи се премногу ниски.

Share on Facebook

Tweet

Follow us

Save