Утре не одете во „Матично“: Шалтерите затворени, вработените почнуваат бојкот – бараат 20% повисоки плати

Граѓаните кои за утре (вторник, 16 декември) планирале да вадат документи од Управата за водење на матични книги, треба да ги одложат своите обврски. Вработените во оваа институција најавија еднодневен бојкот на работата, што значи дека шалтерите ќе останат затворени за странки.

Од Конфедерацијата на синдикалните организации на Македонија (КСОМ) појаснуваат дека ова е предупредувачки чекор по цела година неуспешни преговори со надлежните.

Вработените утре физички ќе бидат присутни на своите работни места во канцелариите, но нема да издаваат никакви документи – ниту изводи, ниту венчаници, ниту потврди.

„Еднодневниот прекин на работата е знак на револт поради долгогодишното непочитување на Колективниот договор и игнорирање на нашите барања за подобри услови,“ велат од КСОМ.

Главната причина за револтот е економскиот статус на вработените. Синдикатот бара линеарно покачување на платите од 20 отсто.

Аргументот за ова барање е специфичната тежина на работата и фактот што службениците секојдневно ракуваат со доверливи лични податоци на граѓаните, а за возврат добиваат, според нив, несоодветен третман.

Од Синдикатот испратија и јасно предупредување до Владата и раководството: доколку овој еднодневен бојкот не вроди со плод и не добијат одговор на барањата, следен чекор е активирање на генерален штрајк, што би значело целосна блокада на издавањето документи на неодредено време.

Share on Facebook

Tweet

Follow us

Save