Филмска акција кај Свети Николе: Полицијата заплени 150 килограми дрога скриена во расипано возило

Полициските „тигри“ пресекоа голем меѓународен канал за трговија со дрога кај Свети Николе, запленувајќи неверојатни 150 килограми марихуана во акција која наликуваше на холивудско сценарио.
Министерството за внатрешни работи (МВР) потврди дека се уапсени тројца скопјани – М.З. (37), И.Б. (61) и Г.Б. (59), кои се обиделе да ја пренесат дрогата користејќи итар трик со наводно расипано возило.

„Расипаниот“ Опел криел богатство
Криминалната шема започнала во Струга, каде првоосомничениот купил возило „Опел комбо“ со швајцарски таблички. Наместо за транспорт на стока, комбето го наполниле со осум големи торби полни со марихуана. Бидејќи возилото наводно не било во возна состојба (или тоа било дел од маската), тие ангажирале шлеп-транспорт.

За сума од само 200 евра, возилото било шлепувано од Струга до Скопје, а потоа за дополнителни 40 евра транспортот продолжил кон Свети Николе.

Кобната грешка на шверцерите
Караванот се движел во формација: товарно возило „Ивеко“ го влечело „Опелот“ со дрогата, додека осомничените ги придружувале во луксузен „Мерцедес“. Сепак, полицијата имала прецизни оперативни сознанија.

На регионалниот пат кај Свети Николе, полициските тимови го пресретнале конвојот. При претресот, во „расипаниот“ автомобил биле пронајдени 50 пакувања со вкупно 150 килограми висококвалитетна марихуана, со што е нанесен сериозен удар на нарко-пазарот.

Сподели:

Share on Facebook

Tweet

Follow us

Save