Црна Гора го укина безвизниот режим за Русите

Црна Гора одлучи да го укине безвизниот режим за руските граѓани, што значи дека од 1 октомври на руските граѓани ќе им биде потребна виза за влез во земјата.

Според црногорскиот медиум ДАН , покрај Русија, одлуката ги засега и граѓаните на Белорусија и Перу, кои исто така повеќе нема да можат да патуваат во Црна Гора без визи.

Со оваа одлука се завршува речиси 18-годишниот период на безвизно патување меѓу Русија и Црна Гора, режим кој значително го олесни доаѓањето на руски туристи и ја направи Црна Гора една од најпосетуваните дестинации од страна на посетителите од Русија на Балканот.

Промената доаѓа како дел од напорите на Црна Гора да ја хармонизира својата визна политика со стандардите на Европската унија, како дел од процесот на европска интеграција на земјата.

Со години, руските туристи сочинуваат важен дел од црногорскиот туристички сектор, особено во текот на летната сезона. Се очекува укинувањето на безвизниот режим да влијае на начинот на кој патуваат руските граѓани, кои сега ќе мора да завршат дополнителни процедури за добивање визи.

Одлуката, исто така, означува затворање на еден од најлесните влезни канали за руските туристи во Европа, бидејќи Црна Гора долго време е една од дестинациите каде што тие можат да патуваат со помалку ограничувања.

Share on Facebook

Tweet

Follow us

Save