Љутков: Отвораме ново поглавје во развојот на македонско-унгарските културни врски

Денеска во Охрид остварив билатерална средба со унгарскиот колега, министерот за култура и иновации Балаж Ханко, кој е дел од владината делегација предводена од претседателот на Владата на Република Унгарија, Виктор Орбан, која е во дводневна посета на нашата земја, објави Зоран Љутков, Министер за култура и туризам.

Оваа посета и денешната средба се уште еден значаен чекор во развојот на билатералните односи меѓу двете земји, особено за македонско-унгарска соработка во областа на културата и туризмот преку конкретни активности.

Македонија и Унгарија во наредниот период ќе отворат ново поглавје во развојот на културните врски меѓу двете држави и ќе настојуваме тоа да резултира со низа проекти и иницијативи. Ќе работиме на обновување и унапредување на соработката во областа на културата, преку програма меѓу надлежните државни органи, но и на документ за регулирање на соработката во областа на туризмот меѓу институциите од оваа сфера од двете држави.

Заеднички ќе се заложиме за културното наследство и актуелното творештво на двете држави да бидат повидливи пред јавноста, за што во наредниот период ќе се организираат денови на македонската и на унгарската култура. За таа цел ќе бидат потпишани и меморандуми за соработка, со што ќе се овозможи континуирана промоција и претставување на културните институции во двете држави.

Министерот Ханко ги сподели и унгарските искуства од реализацијата на манифестацијата „Веспрем – европска престолнина на културата за 2023 година“, и ја актуелизиравме темата за интензивирање на соработката меѓу двете канцеларии на програмата „Креативна Европа“.

Share on Facebook

Tweet

Follow us

Save