Ќе ги уништиме сите електрани и мостови на Иран ако не преговараат, се закани Трамп

Доналд Трамп синоќа се закани дека САД ќе ги прошират нападите врз Иран следната недела и ќе ги таргетираат електраните и мостовите доколку Техеран не се согласи на договор, пренесува „Гардијан“.

„Следната недела за нив работите стануваат навистина лоши, бидејќи следната недела доаѓаат електраните. Следната недела доаѓаат мостовите. Ќе ги уништиме сите нивни електрани. Ќе ги уништиме сите нивни мостови, освен ако не седнат на маса и не преговараат“, изјави американскиот претседател во интервју за „Фокс њуз“.

Трамп даде слични изјави и во март, кога се закани дека ќе ги „уништи“ иранските електрани и постројките за свежа вода доколку Техеран наскоро не се согласи на мировни услови.

Уништувањето цивилна инфраструктура, како што се објекти за производство на електрична енергија и за водоснабдување, би било спротивно на меѓународното хуманитарно право и веројатно би претставувало воено злосторство.

Изјавите на Трамп уследија додека американските сили четврти ден по ред изведуваа напади врз Иран и повторно воведоа поморска блокада на пристаништата на земјата во Ормускиот Теснец.

Американската Централна команда (ЦЕНТКОМ) соопшти дека најновите напади биле насочени кон „намалување на капацитетите на Иран што се користат за напади врз комерцијалниот поморски сообраќај“ во теснецот, клучен коридор за транспорт на нафта и на гас од Персискиот Залив, каде Техеран во повеќе наврати извршил напади врз цивилни пловила.

Иранските државни медиуми објавија дека имало експлозии во близина на пристанишниот град Бандар Абас, во близина на Ормускиот Теснец, како и на други локации.

Како одговор, Иранската револуционерна гарда соопшти дека извршила напади врз воени објекти што ѝ припаѓаат на Петтата флота на САД во Бахреин.

Бахреин и Кувајт исто така беа нападнати, а армијата на Јордан утринава соопшти дека нејзината воздушна одбрана пресретнала и соборила три балистички ракети кои влегле во нејзиниот воздушен простор.

Иранската државна новинска агенција ИРНА претходно објави дека иранските сили извршиле напад со дрон врз воена база во Јордан во која се распоредени американски воени авиони.

Борба за контрола врз Ормускиот Теснец
Иранската револуционерна гарда предупреди дека доколку Вашингтон се обиде да го блокира извозот на нафта и гас од регионот, би можеле да бидат затворени и други извозни патишта што ги користат САД и нивните сојузници, порачувајќи дека регионалниот извоз на енергенси ќе биде „за сите или за никого“.

Деновите на возвратни напади низ Блискиот Исток од страна на Иран, како и обидите на двете страни да воспостават контрола врз водниот пат, се закануваат повторно да го турнат регионот кон целосна војна.

Трамп претходно се откажа од заканата дека бродовите ќе мора да плаќаат 20-отстотна такса на САД за „безбедност“ во Ормускиот Теснец, заменувајќи ја со, како што ја опиша, инвестиции и трговски договори со заливските арапски држави.

Американскиот претседател рече дека одлучил да ја укине таксата „врз основа на многу продуктивните разговори со лидерите на Блискиот Исток“ и најави „огромни“ инвестиции, само пет часа пред таксата да стапи во сила.

Тој додаде дека САД ќе продолжат со блокадата на иранските пристаништа.

Шансите за преговори насочени кон постигнување трајно примирје, по кревкиот привремен прекин на огнот потпишан на 17 јуни, се чини дека стануваат сè помали.

Заменик-министерот за надворешни работи на Иран, Казем Гарибабади, изјави дека одлуката на САД повторно да ја воведат блокадата „на некој начин го урнала Исламабадскиот меморандум“.

На прашањето колку долго ќе продолжат американските напади, Трамп одговори дека „ќе продолжат додека јас не кажам дека е доволно“.

Share on Facebook

Tweet

Follow us

Save