Објавено на:

Американците купуваат вода и генератори, Британците создаваат резерви од храна – продажбата нагло расте

t

Во САД расте побарувачката за флаширана вода, конзервирана храна и генератори, додека во Велика Британија граѓаните сè повеќе купуваат производи со долг рок на траење. Зголемените набавки следуваат по серијата технолошки прекини во Америка и новите британски препораки за подготвеност при кризи. Во Британија продажбата на флаширана вода пораснала за 67 проценти, а на конзервирани производи за 37 проценти. Иако ваквото однесување потсетува на купувањата за време на пандемијата, достапните податоци не потврдуваат општ недостиг на храна и вода.

Американскиот трговски синџир „Волмарт“ потврдил за Ројтерс дека потрошувачите купувале повеќе вода, пропан и кампинг-опрема, додека аналитичарите на „Мизухо“ забележале зголемена побарувачка за производи за итни случаи во „Костко“. Сличен тренд пријавил и „Трактор саплај“, особено кај генераторите и резервоарите за складирање течности. Според податоците на истражувачката компанија „Сиркана“, во четирите недели заклучно со 1 ноември, продажбата на таблети за дезинфекција на вода пораснала за 154 проценти во споредба со истиот период минатата година, на дезинфекциски марамчиња за 72 проценти, а на влажни марамчиња за 20 проценти.

Зголеменото купување се поврзува со неодамнешните прекини во услугите на „Мајкрософт“, проблемите во авиосообраќајот и нарушувањата во одредени банкарски системи. Загриженоста дополнително ја поттикнале објави на социјалните мрежи за наводен 90-дневен прекин на електричната енергија, иако проверките покажале дека таквите тврдења се неосновани. „Спојот на владините активности и вознемиреноста на социјалните мрежи ги поттикна подготовките за најлошото сценарио да станат вообичаено потрошувачко однесување во изминатите неколку месеци“, наведува аналитичарот Ник Моди од „РБЦ капитал маркетс“. Американските власти соопштиле дека неодамнешните технолошки инциденти не се меѓусебно поврзани и дека не биле предизвикани од кибернапади.

Во Велика Британија, пак, продажбата пораснала по започнувањето на владината кампања „Биди подготвен“ на 22 октомври, со која домаќинствата се охрабруваат да обезбедат храна, вода и основни средства за три дена во случај на прекин на струјата, водоснабдувањето или други итни ситуации. Истражувањето на „Ворлдпанел“ покажува дека во првите десет дена по почетокот на кампањата, продажбата на флаширана вода пораснала за 67 проценти, на конзервирани производи и храна во тегли за 37 проценти, а на средства за дезинфекција на рацете за 83 проценти во споредба со истиот период лани.

Сепак, истражувачите нагласуваат дека не станува збор за панично купување. „Купувачите очигледно ја забележаа кампањата, но ова не беше панично купување“, изјавил Фрејзер Мекевит од „Ворлдпанел“, посочувајќи дека помалку од една третина од домаќинствата купиле флаширана вода во октомври. Според него, растот произлегува од поголем број граѓани кои додаваат резерви при редовното пазарување, наместо од купување огромни количества одеднаш. Британскиот Завод за национална статистика објави дека вкупниот обем на малопродажбата во октомври пораснал за 0,7 проценти во однос на септември, при што супермаркетите пријавиле зголемена продажба на конзервирана храна и трајно млеко.

Британските препораки предвидуваат по три литри вода дневно за пиење по човек, односно девет литри за три дена, како и храна што не бара ладење или готвење, основни лекови, батериска ламба, преносен полнач и готовина доколку електронското плаќање не функционира. Слични насоки на 3 ноември претстави и Европската комисија, препорачувајќи граѓаните да можат самостојно да ги задоволат основните потреби во првите 72 часа од вонредна ситуација. „Кога ќе се случи катастрофа, првите часови можат да направат огромна разлика“, изјави еврокомесарката Хаџа Лахбиб. Насоките немаат задолжителен карактер и се наменети за превентивна подготвеност, а не како предупредување за непосредна катастрофа.

Иако податоците потврдуваат зголемена побарувачка за одредени производи во САД и Велика Британија, причините за купувањето се различни. Во Америка значајна улога имаат загриженоста по технолошките прекини и дезинформациите на интернет, додека британските домаќинства главно реагираат на официјалните препораки. Засега нема доволно докази дека станува збор за глобален бран на панични набавки или за недостиг на основни производи во размери какви што беа забележани за време на пандемијата.

ПОВРЗАНИ ВЕСТИ

Американците купуваат вода и генератори, Британците создаваат…

Во САД расте побарувачката за флаширана вода,…

Рама: Албанија никогаш нема да го попречува…

Албанскиот премиер Еди Рама појасни дека неговите…

Мачките станаа бизнис вреден над 100 милијарди…

Мачките одамна не се само домашни миленици,…

Инструктор од Србија паднал од стаза за…

Инструктор од Србија паднал од стаза за…

Мицкоски: „One Stop Shop“ системот ќе го…

Премиерот Христијан Мицкоски, на заедничкиот настан со…