Бомбени закани над Европа: Три авиони на пат кон Бугарија принудно слетале, подигнати и воени авиони

Три патнички авиони на „Рајанер“ (Ryanair), кои летале кон Бугарија, биле принудени да слетаат на аеродроми надвор од планираната рута по добиени дојави за поставени бомби. Наместо вообичаената постапка за слетување, бил активиран безбедносен протокол за вонредна ситуација поради сомнеж за закана во авионот.

Авионот што требало да сообраќа на линијата Лондон – Софија слетал денеска околу пладне на аеродромот кај Пловдив, со 184 патници. Другите два авиона, кои летале од Копенхаген и Мадрид, требало да слетаат на аеродромот „Васил Левски“ во Софија. Сите три авиони биле на „Рајанер“ и извршувале цивилни летови.

Бугарското Министерство за одбрана соопшти дека дежурните ловци МиГ-29 од Третата воздухопловна база „Граф Игнатиево“ полетале во 10:11 часот со задача да ги пресретнат и придружуваат трите авиони.

Заканите биле испратени по електронска пошта. По добиените дојави била активирана безбедносна постапка и биле извршени проверки на авионите. Од Министерството за одбрана појасниле дека мисијата била реализирана според процедурата „Air Policing“.

Дојави за поставени бомби во авиони биле регистрирани и во други делови на Европа. Патнички авион „Ербас А320“, кој летал од Даблин кон Рим, бил пренасочен кон база на француските воздухопловни сили. Ситуацијата била под контрола на француската влада, но засега не биле објавени дополнителни детали.

Два авиона на „Рајанер“, на летови од Португалија и Ирска, како и авион на „Аер Лингус“ на линијата Даблин – Рим, биле пренасочени и принудно слетале на римскиот аеродром „Фјумичино“ по анонимни дојави за поставени експлозивни направи. Претходно, авионите биле придружувани низ воздушниот простор од ловци на италијанските воздухопловни сили.

Поради активирањето на вонредните безбедносни протоколи, копнените служби и контролата на летање привремено ги блокирале пистите за полетување. Повеќе од 30 минути немало ниту едно полетување од аеродромот.

Подоцна било соопштено дека од утринските часови дојави добиле вкупно осум летови. Меѓу нив биле и летот Варшава – Брисел на полската авиокомпанија ЛОТ, како и два лета кон Копенхаген.

И во средата седум авиони биле предмет на бомбени закани, поради што безбедносните служби низ Европа биле ставени во состојба на готовност. Две од тогашните дојави се однесувале на авиони што летале кон Софија.

Во авионот од Бергамо имало 176 патници, седум членови на екипажот и 29 чекирани парчиња багаж, а не бил превезуван опасен товар. Авионот слетал на аеродромот „Васил Левски“ во 11:13 часот.

Околу два часа подоцна, во 13:36 часот, слетал и авионот од Даблин. Во него имало 186 патници, шест членови на екипажот и 56 парчиња чекиран багаж, без опасен товар.

Share on Facebook

Tweet

Follow us

Save