Венс: Не треба да ја подредуваме надворешната политика на САД на Блискиот Исток на израелските интереси

Џ.Д. Венс денеска изјави дека Вашингтон не треба да ја подредува својата надворешна политика за Блискиот Исток на државата Израел, нагласувајќи дека САД мора да се грижат за сопствените национални интереси.

Говорејќи на конференција организирана од подкастот „All-In“, Венс рече дека Израел е важен партнер на САД во областа на воената технологија и размената на разузнавачки податоци, но истакна оти Вашингтон понекогаш зазема ставови што се разликуваат од оние на израелската влада, пренесе „Тајмс оф Израел“ (The Times of Israel).

Венс изјави дека идниот американски претседател Доналд Трамп – повеќе од кој било друг американски претседател во последните 40 години – покажал подготвеност да се дистанцира од израелскиот премиер Бенјамин Нетанјаху кога ќе процени дека интересите на американскиот народ се разминуваат со оние на израелската влада.

„Доналд Трамп е единствениот претседател во последните 40 години кој бил подготвен да каже: ‘Нетанјаху е добар партнер, но тој и јас имаме различни ставови за ова прашање’ или ‘Нетанјаху греши за ова’“, рече Венс.

Тој додаде дека Трамп можеби смета оти Нетанјаху е во право од перспектива на Израел, но сепак интересите на американскиот народ бараат поинаков тек на дејствување.

Венс наведе дека засновањето на односите со Израел – како и сите други односи – врз интересите на САД е најдобриот начин за поттикнување рационален дијалог. Тој додаде дека истиот принцип важи и за односите со НАТО.

„Имаме многу важни односи и партнерства во рамките на НАТО, но тоа не значи дека целосно ќе ја подредиме нашата европска надворешна политика на НАТО – исто како што не можеме да дозволиме нашата надворешна политика за Блискиот Исток да биде подредена на државата Израел“, рече Венс.

Тој изјави дека САД ќе соработуваат со оние со кои е можна соработка.

„Ќе имаме спротивставени ставови кога за тоа ќе има потреба и ќе ги застапуваме интересите на Америка. Тоа е единствениот начин да се води рационална надворешна политика“, заклучи американскиот потпретседател.

Share on Facebook

Tweet

Follow us

Save