Вештачка интелигенција „чита“ мозочни снимки и реконструира што гледа човекот

Научници развија систем со вештачка интелигенција кој може да реконструира слики што човек ги гледа врз основа на снимки од неговата мозочна активност, што претставува нов чекор во развојот на технологиите за таканаречено „читање на мисли“.

Тим предводен од Михал Ирани од Институтот за наука „Вајцман“ користел мозочни снимки од осум испитаници на кои им биле прикажани илјадници различни слики. Системот анализирал кои делови од мозокот реагираат на формата и содржината на сликата, а потоа со помош на ВИ создавал нејзина реконструкција.

Според истражувачите, новиот „мозочен декодер“ дава попрецизни резултати од претходните технологии, иако сè уште прави грешки. Во еден од примерите, слика од куче во када била реконструирана како коза во када.

Технологијата во иднина би можела да им помогне на парализираните лица кои не можат да комуницираат, но истовремено отвора сериозни прашања за приватноста.

„Ако постои начин тајно да се извлечат информации за тоа за што размислувате, тогаш 150 години научна фантастика би можеле да станат реалност, а тоа е загрижувачки“, предупреди невронаучникот Томи Спраг од Универзитетот во Калифорнија, Санта Барбара.

Засега системот бара големи и скапи апарати за функционална магнетна резонанца, но експертите предупредуваат дека ризиците би станале многу поголеми доколку слични методи во иднина се применат кај преносливи уреди за мерење на мозочната активност.

Невронаучникот Марчело Јенка предупреди дека таква технологија теоретски би можела да се злоупотреби и за собирање информации за мозочната активност без согласност на корисниците.

Share on Facebook

Tweet

Follow us

Save