Виткоф утре патува во посета на Москва: Ќе предложам средба меѓу Путин, Зеленски и Трамп

Специјалниот пратеник на Соединетите Држави, Стив Виткоф, ќе предложи директни разговори меѓу рускиот претседател Владимир Путин, американскиот претседател Доналд Трамп и украинскиот претседател Володимир Зеленски, со цел постигнување прекин на огнот – договор до кој се дојде за време на средбата во Осло.

Предлогот за трилатерални преговори меѓу лидерите за мировно решение – што би претставувало прв ваков самит од почетокот на руската инвазија врз Украина – беше објавен на прес-конференција во вторникот, по разговорите меѓу Володимир Зеленски и Стив Виткоф во главниот град на Норвешка.

Норвешкиот премиер Јонас Гар Сторе, кој беше домаќин на разговорите, изјави дека Виткоф во среда ќе отпатува за Русија за да ги претстави предлозите за мировни услови, вклучително и идејата за самит на кој би учествувале тројцата лидери.

Средбата во Осло се одржа по неколкудневни зголемени тензии меѓу Украина и американскиот претседател.

„Денес бевме домаќини на, би рекол, добри и конструктивни разговори, кои беа неопходни по настаните од изминатата недела“, изјави Сторе по средбата.

„Виткоф утре патува за Санкт Петербург, каде што ќе се сретне со руското раководство за да ги пренесе идеите од оваа средба, како и предлозите изготвени од европските и американските партнери – што би можело да го отвори патот за средба на највисоко ниво“, додаде тој.

Според Сторе, денешните дискусии опфатиле „прашања поврзани со безбедноста на Украина, план за повоена просперитет, територијални прашања, санкции, како и европскиот безбедносен поредок по завршувањето на оваа војна“.

Претходните обиди за организирање директна средба меѓу Путин и Зеленски беа неуспешни, а Кремљ инсистира дека таква средба може да се одржи само во Москва.

На прес-конференција, Зеленски оцени дека денот поминал позитивно. Тој најпрвин разговарал телефонски со американскиот државен секретар Марко Рубио, по што следела средба со Виткоф. Тој нагласи дека за прашањата поврзани со иднината на украинската територија можат да разговараат само шефовите на држави, како и дека секој мировен договор мора да вклучува цврсти безбедносни гаранции.

Зеленски изјави дека лидерите на САД, Кина и Русија би можеле да одржат трилатерални средби, но дека не можат да склучуваат договори што се однесуваат на Украина – или на војната во Украина – без учество на самата Украина.

„Не знам што би опфаќала една трилатерална средба меѓу Америка, Кина и Русија; тоа, се разбира, зависи од нив. Но, доколку станува збор за Украина и за нашата иднина, тоа е прифатливо само доколку и ние сме на преговарачката маса. Тоа е сосема јасно“, рече Зеленски.

Share on Facebook

Tweet

Follow us

Save