Вонредна состојба во Исланд по новата ерупција на вулкан

Поради новата вулканска ерупција што почна денеска на југозападниот дел на Исланд, евакуирани се геотермалната бања Blue Lagoon и малиот рибарски град Гриндавик.

Прогласена е вонредна состојба, но не се очекува да бидат засегнати авионските патувања до и од Исланд.

Градоначалникот на Гриндавик, Фанар Јонасон, изјави за државната телевизија RUV дека е загрижен за количината на лава што тече кон градот, која е „многу поголема по волумен“ отколку што се гледа по неодамнешните ерупции.

Дистрибутерот на енергија HS Veitur рече дека електричната енергија на Гриндавик била исклучена како мерка на претпазливост.

Три лица одбиле да го напуштат градот, објавија локалните медиуми.

Официјалните лица издадоа изјава „за сите оние во или во близина на Гриндавик да ја напуштат областа и да се движат на безбедно растојание“.

Сите патишта, освен еден, во и надвор од градот сега се непристапни.

Снимката од местото на ерупцијата покажува ѕид од стопена карпа кој пука висок до 50 метри, а огромна количина пепел покрива голем дел од небото.

Меѓународниот аеродром Кефлавик соопшти дека работи како и обично и дека не се очекува да биде погоден од ерупцијата.

Официјални лица известија за „интензивна земјотресна активност“ пред ерупцијата во средата.

Геофизичарот Ари Траусти Гудмундсон изјави дека научниците веќе некое време очекувале нова ерупција.

Повеќето од 4.000 жители на Гриндавик беа трајно евакуирани во ноември, пред ерупциите во декември, јануари, февруари и март.

Исланд има 33 активни вулкански системи и се наоѓа над она што е познато како Средноатлантскиот гребен, границата помеѓу двете најголеми тектонски плочи на планетата.

Ова е осма ерупција од 2021 година, а научниците веруваат дека областа влегува во нова вулканска ера која би можела да трае со децении, па дури и со векови, пренесува Танјуг.