Во Нови Сад отворен амфитеатар кој го носи името на македонскиот научник Влатко Саздовски

Денеска свечено е отворен амфитеатарот во институтот „БиоСенс“, во Нови Сад кој го носи името на Влатко Саздовски, кој загина при падот на бетонската настрешница на зградата на железничката станица во Нови Сад на 1 ноември 2024 година, пренесува Н1.

Визуелното уредување на амфитеатарот е дело на академската уметница Светлана Милиќ, замислено на таков начин што ќе го зачува трајното сеќавање на Саздовски на достоинствен начин.

На церемонијата беше нагласено дека придонесот на Саздовски во Институтот „Биосенс“ е непроценлив и дека неговата загуба е исклучителна загуба за целата научна заедница.

Во име на своите колеги, Мина Мировиќ се збогува со Саздовски, која истакна дека сите го паметат по насмевката со која доаѓаше во канцеларија секој ден.

„Васко беше успешен и сакаше да се занимава со наука, да смислува решенија за проблемите со кои се соочувавме. Гледано однадвор, се чинеше дека лесно може да постигне сè што замислуваше. Умееше да нè охрабри на поинаков начин на размислување“, изјави таа.

Директорот на Институтот, Владимир Црнојевиќ, истакна дека семејството „БиоСенс“ го сочинуваат луѓе од целиот свет, дека Васко Саздовски имал „најголема насмевка во тоа семејство“ и дека навистина оставил трага на него. Тој оцени дека амфитеатарот што ќе го носи неговото име е посебен, и архитектонски, функционално и естетски.

„Заедно со оваа зграда, која е нешто посебно, треба да живее долго време, за сегашните научници, како и иднината на Србија, да ја користат со најдобра намера и за најдобра цел, а тоа е да се развива науката и слободната мисла тука. Името на Васко ќе живее со тоа“, рече Црнојевиќ.

Васко Саздовски докторирал на Универзитетот Кренфилд во Велика Британија и во кариера што траела повеќе од дваесет години се занимавал со роботика и автономни системи во институции во Македонија, Германија и Хрватска, а потоа и во овој институт во Нови Сад.

Денешната церемонија затоа, симболично, се одржа на Светскиот ден на роботиката.

Share on Facebook

Tweet

Follow us

Save