Вучиќ: Граѓаните можат мирно да спијат – Србија ќе има и електрична енергија и доволно гас за зимата

Претседателот на Србија, Александар Вучиќ, соопшти дека е постигнат договор за продолжување на снабдувањето на земјата со природен гас до 31 март 2026 година, со што, како што рече, е обезбедена енергетската стабилност за претстојната зимска сезона.

Изјавата беше дадена по доделувањето договори за вработување на најдобрите дипломци од медицинските факултети и средните медицински училишта.

„Граѓаните можат да бидат спокојни и мирно да спијат. Србија ќе има и електрична енергија и доволно гас за зимата“, изјави Вучиќ.

Одговарајќи на новинарски прашања, српскиот претседател потврди дека Гаспром води разговори за продажба на својот удел во Нафтната индустрија на Србија (НИС), меѓу другите и со унгарската компанија MOL.

„Имаме информации дека се водат разговори, вклучително и со унгарскиот MOL. Немаме ништо против, Унгарците се наши пријатели. Само сакаме процесот да заврши што е можно побрзо, идеално до 15 јануари“, нагласи Вучиќ.

Вучиќ појасни дека, дури и во случај Србија да не се соочи со проблеми поврзани со секундарни санкции или транспорт, земјата технички не е во можност да увезе 6.000 тони дизел дневно, колку што изнесува нејзината потрошувачка.

Тој повтори дека Србија нема да пристапи кон, како што рече, „отимање“ на НИС, дури и доколку не дојде до договор за продажба на рускиот удел. Во таков случај, државата би била подготвена и да ја преплати компанијата.

Претседателот информираше и дека досега се поднесени околу 350.000 барања за легализација и ги повика граѓаните да ги достават своите пријави што е можно поскоро, истакнувајќи дека приоритет ќе имаат оние кои први аплицирале.

Share on Facebook

Tweet

Follow us

Save