Вучиќ: Мислам дека не разбирате колку напредуваше српската армија

Хрватските функционери вршат притисок врз Западот затоа што сакаат да ја блокираат модернизацијата на српската армија, изјави денес српскиот претседател Александар Вучиќ, додавајќи дека Србија ја зајакнува својата армија за да одврати потенцијална агресија и не се подготвува за војна.

На прашањето на новинарите каква порака испраќа Загреб кога претседателот на хрватскиот парламент Гордан Јандроковиќ и министерот за одбрана Иван Анушиќ бараат од Западот да изврши притисок врз Белград затоа што Србија, како што тврдат, „се вооружува со офанзивно оружје“, Вучиќ одговори дека Хрватска треба да го разгледа сопственото вооружување, алудирајќи на испораката на германски хаубици на хрватската армија.

„Нашата цел е одвраќање. Не сакаме војни, не сакаме конфликти, но нема да дозволиме никој да ја урива и уништува нашата земја. Што се однесува до офанзивното оружје, ги погледнавме нашите соседи и потоа направивме подобро“, рече Вучиќ за време на посетата на Националниот центар за деминирање во Велика Моштаница, според извештајот на Танјуг.

Тој праша дали набавката на 16 германски самоодни хаубици „Панцер 2000“ е одбранбено оружје и дали Хрватска и Германија ја прашале Србија за тоа. „А кога ги зедоа хеликоптерите „Киова“ со ракети „Хелфаер“, дали тоа беше за одбрана на нешто или за офанзивна акција?“, рече Вучиќ.

Тој оцени дека Хрватска може да испраќа такви пораки до „некого во својата јавност“ и нагласи дека Србија „одговорно пристапува“ кон опремувањето и усовршувањето на својата армија.

„Мислам дека не разбирате колку напредувала српската армија, бидејќи не се фалиме доволно со тоа и не сакаме да зборуваме за сè“, рече тој. Вучиќ најави дека само дел од новите способности на српската армија ќе бидат прикажани на јавноста за време на воената вежба на 13 и 14 септември на полигонот Пестер.

Share on Facebook

Tweet

Follow us

Save