Грција побарала информации од Панама за трансфери на милиони на сметките на Ева Кајли

Шефот на грчката канцеларија за спречување перење пари, Хараламбос Вурлиотис, испратил писмо до панамските власти во кое бара информации дали се суми од над 20 милиони евра од Катар, објави грчката телевизија Скај.

Кајли, европратеничка од Грција, беше уапсена од белгиската полиција на почетокот на декември. Против неа и група поединци, вклучително и поранешниот европратеник Антонио Панцери, беа покренати обвиненија дека добиле пари од Катар, Мароко и можеби други земји за да лобираат во нивна корист. Во нивните домови биле пронајдени значителни суми на готовина, кои, според изданија, изнесуваат околу 1,5 милиони евра.

Причината за барањето на грчките власти е објава на интернет, во која се видливи банкарски документи, според кои на сметките на Кајли и членовите на нејзиното семејство во панамската банка Bladex of Panama легнале 28 милиони евра со земја на потекло Катар. Се вели дека 20 милиони легнале на сметката на Ева Кајли, 4 милиони евра – на сметката на нејзиниот татко Александрос Каилис и уште 4 милиони на нејзината мајка Марија Игнатијаду.

Грчкиот адвокат на Кајли, Михалис Димитракопулос, ги отфрли документите на интернет како невистинити и рече дека тој самиот поднел барање до грчките власти за спречување перење пари да и се обратат на Панама за да докаже дека фактите во нив се невистинити.

Грција започна сопствена истрага по обвинувањата против Кајли во Белгија. Веќе се запленети недвижности и сметки на европратеничката во Грција, како и на членовите на нејзиното потесно семејство и на две невладини организации кои и припаѓаат на нејзината сестра Мадалена.

Share on Facebook

Tweet

Follow us

Save