Европа и Азија против планот на Инфантино за приватни инвеститори во ФИФА

Планот на претседателот на ФИФА, Џани Инфантино, да отвори дел од комерцијалниот бизнис на светската фудбалска федерација за приватни инвеститори наиде на силен отпор од Европа, Азија и Северна и Централна Америка. Регионалните конфедерации предупредуваат дека предлогот бил подготвен без суштински консултации и може долгорочно да го промени начинот на кој се управува со Светското првенство и со другите натпреварувања на ФИФА.

Азиската фудбалска конфедерација – АФЦ соопшти дека не била консултирана пред ФИФА јавно да го претстави проектот „FIFA Forward Enterprise“. Оттаму изразија разочарување што предлог со толку големи правни, финансиски и стратешки последици бил објавен пред азиските федерации да добијат можност да го разгледаат преку воспоставените механизми на управување.

Според АФЦ, иницијативите што можат да ја преобликуваат комерцијалната иднина на фудбалот мора да се темелат врз транспарентност, добро управување и реални консултации со конфедерациите, националните федерации и другите засегнати страни. Азиската конфедерација, која обединува 47 национални асоцијации, побара доволно информации и време за целосна анализа на предлогот.

Слична реакција пристигна од КОНКАКАФ, конфедерацијата за Северна и Централна Америка и Карибите. Оттаму соопштија дека за планот дознале преку медиумите и последователното соопштение на ФИФА, оценувајќи дека недостигот од редовна процедура предизвикува сериозна загриженост. КОНКАКАФ нагласи дека одлуките за иднината на фудбалот треба да се носат преку цврсти процедури и долгорочно одговорно управување.

Отпорот првично дојде од УЕФА, која оцени дека Светското првенство не е деловен имот со кој ФИФА може да располага без широка согласност од фудбалската заедница. Европската конфедерација предупреди дека внесувањето приватни инвеститори во структура што ќе управува со комерцијалните права и организацијата на турнирите отвора прашања за независноста, интегритетот и можниот судир меѓу спортските и финансиските интереси.

ФИФА на 28 јули официјално го претстави предлогот за формирање нова подружница под името „FIFA Forward Enterprise“ – ФФЕ. Во неа треба да бидат обединети комерцијалните права за телевизиски преноси, спонзорства, билетите и лиценцирањето, како и оперативната организација на Светските првенства и другите турнири.

Новата компанија е проценета на околу 20 милијарди долари. ФИФА планира на долгорочни приватни инвеститори да им понуди малцински удел до 20 проценти, со што би се обезбедиле најмногу 4,2 милијарди долари свеж капитал. Според светската федерација, инвеститорите не би имале контролен пакет, а ФИФА би ја задржала целосната надлежност врз натпреварувањата, календарот, правилата и другите спортски одлуки.

Инфантино го претставува проектот како начин за зголемување на средствата за развој на фудбалот. ФИФА тврди дека преку новиот модел во следните години би можеле да бидат распределени повеќе од 10 милијарди долари меѓу нејзините 211 членки. На секоја федерација ѝ се нуди можност да добие еднократни 20 милиони долари за посебни проекти, а значително би се зголемиле и редовните средства преку програмата „ФИФА форвард“.

Токму финансиската понуда се толкува како обид Инфантино да обезбеди поддршка од националните федерации пред гласањето за новата структура. Проектот не може да биде спроведен само со одлука на администрацијата на ФИФА, туку треба да добие поддршка од мнозинството членки и соодветно одобрение од Советот на ФИФА.

Проблемот за Инфантино е што реакциите покажуваат дека значаен дел од фудбалскиот систем не бил вклучен во подготовката на проектот. Покрај УЕФА, АФЦ и КОНКАКАФ, загриженост изразија Англиската и Француската фудбалска федерација, кои соопштија дека не располагале со детални информации за планот пред неговото објавување.

Критичарите не тврдат дека со планот формално се продава самото Светско првенство. Предлогот се однесува на продажба на малцински удел во компанија што би управувала со неговите комерцијални права и оперативна реализација. Сепак, тие предупредуваат дека приватните инвеститори по природа очекуваат финансиски поврат, што може да создаде притисок за повеќе натпревари, поскапи билети, промени во календарот и носење одлуки според комерцијалната исплатливост.

Европскиот комесар за спорт Глен Микалеф најави дека Европската Унија ќе го разгледа проектот, особено можниот судир меѓу регулаторните овластувања на ФИФА и финансиските интереси на приватните сопственици. Според него, прекумерната комерцијализација може да го загрози европскиот спортски модел и довербата во управувањето со фудбалот.

Отпорот од Азија е особено значаен бидејќи Инфантино традиционално сметаше на поддршката од помалите и неевропските федерации, на кои програмите за развој им обезбедуваат значителен дел од потребните средства. Јавната реакција на АФЦ покажува дека спорот повеќе не е ограничен на долгогодишното ривалство меѓу ФИФА и УЕФА, туку се проширува и на конфедерациите што претходно почесто ги поддржуваа неговите иницијативи.

ФИФА останува на ставот дека ќе ја задржи целосната контрола врз спортските одлуки и дека целата нето-корист од новата компанија ќе биде вратена во фудбалот. Конфедерациите, пак, бараат пред гласањето да бидат објавени целосната сопственичка структура, правата на инвеститорите, механизмите за надзор и долгорочните последици врз Светското првенство и другите турнири.

Share on Facebook

Tweet

Follow us

Save