ЕУ ги укина царините за низа американски производи

Европската Унија и официјално усвои закон со кој се укинуваат увозните царини за голем број американски производи, исполнувајќи го својот дел од трговскиот договор постигнат со администрацијата на американскиот претседател Доналд Трамп.

Со овој потег е избегната можноста за нов трговски конфликт меѓу двете страни на Атлантикот.

Европскиот парламент минатата недела го поддржа пакетот мерки со 440 гласа „за“, 151 „против“ и 50 воздржани. Гласањето се одржа речиси единаесет месеци по постигнувањето на рамковниот договор меѓу Брисел и Вашингтон за унапредување на трговските односи.

Дополнителен притисок врз европските влади изврши Трамп, кој предупреди дека САД би можеле да воведат значително повисоки царини доколку Европската Унија не го спроведе договорот до 4 јули.

Откако законот беше потврден и од Советот на ЕУ, европската страна го исполни поставениот рок.

Според договорот, ЕУ ги укинува царините за низа американски индустриски производи и овозможува повластен пристап на европскиот пазар за одредени земјоделски производи од САД. Воедно, продолжен е и режимот на бесцарински увоз на американски јастог, кој првично беше договорен за време на првиот претседателски мандат на Трамп.

Новите правила ќе важат до крајот на 2029 година, но содржат и заштитни механизми што ѝ овозможуваат на Европската Унија да ги суспендира трговските поволности доколку САД не ги почитуваат преземените обврски или еднострано ги изменат условите од договорот.

Share on Facebook

Tweet

Follow us

Save