ЕУ трајно блокира 210 милијарди евра руски средства

Европската Унија одлучи на неодредено време да замрзне средства во вредност од 210 милијарди евра што ги поседува Руската централна банка. Мерката, заснована на клаузула за економска вонредна состојба, има за цел да спречи надворешни обиди за ослободување на средствата пред Москва да му ги плати воените репарации на Киев, објави „Еуроњуз“ .

Со овој потег, ЕУ сака да обезбеди контрола врз замрзнатите средства поради загриженоста дека САД би можеле да се обидат да ги користат средствата во иден мировен договор со Москва.

Долгорочното замрзнување беше договорено денес од амбасадорите на земјите-членки, повикувајќи се на член 122 од Договорот за ЕУ. Овој член овозможува одлуките да се донесуваат со квалификувано мнозинство, заобиколувајќи го Европскиот парламент и потенцијалното вето од страна на поединечните држави.

Новата регулатива забранува трансфер на 210 милијарди евра назад во Руската централна банка. Најголемиот дел од средствата, околу 185 милијарди евра, се чуваат во Euroclear, централниот депозитар за хартии од вредност во Брисел, додека преостанатите 25 милијарди евра се чуваат во приватни банки.

Досега, средствата беа замрзнати преку стандардниот режим на санкции, кој бараше едногласна одлука од сите 27 членки и обновување на секои шест месеци, што го правеше ранлив на блокади.

Минатата недела, Европската комисија предложи активирање на Член 122, кој претходно беше користен во кризи како што се пандемијата COVID-19 и енергетската криза. Комисијата тврди дека руската инвазија на Украина предизвикала „сериозно економско влијание“ низ целата Унија, наведувајќи „сериозни прекини во снабдувањето, поголема неизвесност, зголемени премии за ризик, пониски инвестиции и потрошувачка“, како и бројни хибридни напади.

„Постои итна потреба да се спречи префрлањето на средства во Русија со цел да се ограничи штетата врз економијата на Унијата“, се вели во предлогот на Комисијата.

Според одлуката, средствата ќе бидат ослободени само кога активностите на Русија „објективно ќе престанат да претставуваат значителни ризици“ за европската економија и кога Москва ќе ѝ плати отштета на Украина „без економски и финансиски последици“ за ЕУ. За деблокирање на средствата ќе биде потребно и квалификувано мнозинство.

„Членот 122 во суштина се однесува на ставање на замрзнувањето на средствата на поодржлива основа, така што нема да се обновува на секои шест месеци“, изјави во четврток висок дипломат, зборувајќи под услов да остане анонимен. „Европскиот совет веќе одлучи дека ова мора да се направи – дека средствата треба да останат замрзнати сè додека Русија не плати воена отштета – па затоа одлуката заснована на членот 122 може да се каже дека е спроведување на таа одлука на Европскиот совет.“

Share on Facebook

Tweet

Follow us

Save