И Врховен го одби барањето на Стојанче Јовановски за случајот со Катја и Ивана: Останува казната од 12 години затвор

Врховниот суд го одби како неосновано барањето за вонредно преиспитување на правосилната пресуда на Стојанче Јовановски, осуден на единствена казна од 12 години затвор за телесна повреда, загрозување на сигурноста и наведување на самоубиство и помагање во самоубиство. Станува збор за предметот поврзан со семејното насилство врз неговата сопруга Ивана и трагедијата во која животот го загубија таа и нивната шестгодишна ќерка Катја.

Советот на Врховниот суд одлучувал на седница одржана на 21 октомври, постапувајќи по предметот КВП2-101/26. Барањето го поднел осудениот преку своите бранители, против првостепената пресуда на Основниот кривичен суд Скопје и пресудата на скопска Апелација.

Иако во соопштението на Врховниот суд не е наведено името на осудениот, броевите и датумите на двете пресуди целосно се совпаѓаат со претходно објавените податоци за предметот против Јовановски.

Основниот кривичен суд Скопје ја донесе пресудата К.бр.551/26 на 7 мај 2026 година. Апелациониот суд Скопје, постапувајќи по предметот КЖ-549/26, на 18 јуни ја одби како неоснована жалбата на Јовановски и ја потврди првостепената пресуда.

Со одлуката на Врховниот суд, изречената единствена казна од 12 години затвор останува во сила.

Јовановски е правосилно осуден за телесна повреда од член 130 став 2 во врска со став 1, загрозување на сигурноста од член 144 став 3 во врска со ставовите 2 и 1 и наведување на самоубиство и помагање во самоубиство од член 128 став 4 од Кривичниот законик.

Предметот се однесува на насилството врз Ивана што ѝ претходело на трагедијата од 2 март годинава во скопската населба Тафталиџе, во која починаа мајката и нејзината малолетна ќерка.

Врховниот суд најави дека пресудата ќе биде објавена на неговата веб-страница, согласно Законот за управување со движењето на предметите во судовите. Во соопштението не се изнесени деталните причини поради кои е одбиено барањето на одбраната.

Share on Facebook

Tweet

Follow us

Save