Меџити: Ново поглавје за Албанците во Македонија, Вреди се обедини во една политичка сила

Еден од лидерите на Вреди, Изет Меџити, објави дека започнува ново политичко поглавје за Албанците во Македонија, најавувајќи обединување во една политичка сила под името „Вреди“.

Во објавата, Меџити порача дека ова не е само политичка одлука, туку историски момент кој, како што наведува, не бил создаден „со калкулации, туку со верба“, и не со поделби, туку со обединување.

„Од многу гласови – еден глас. Од многу партии – една сила. Од надеж – победа“, напиша Меџити, нагласувајќи дека „Вреди“ треба да стане заеднички албански политички фронт.

Тој во пораката истакнува дека новото обединување не е создадено за „поделба на функции и фотелји“, туку за, како што наведува, „промена на албанската политичка историја“.

Според Меџити, Албанците повеќе не сакаат изговори, туку конкретни резултати, развој, нови работни места и политичка сила која реално ќе одлучува.

„Албанците сакаат политика што навистина ги претставува и албанска моќ што одлучува. А таа сила денес има име – Вреди“, порача тој.

Во објавата се потенцира и дека времето на поделби завршува, а започнува период на политичко обединување и заедничка борба.

„Времето на распарчување заврши. Дојде време Албанците да се обединат. Дојде време Албанците да победуваат“, наведува Меџити.

Тој пораката ја завршува со оценка дека ова не е почеток само на нова партија, туку „почеток на нова албанска ера“.

Најавата доаѓа во период на интензивни политички преструктуирања на албанскиот политички блок во Македонија, а останува да се види како ќе се реализира процесот на обединување и какви ќе бидат идните политички чекори на „Вреди“.

Share on Facebook

Tweet

Follow us

Save