Мисајловски: Да го чуваме споменот на хероите кои го дадоа животот за татковината
Во СЦ „Борис Трајковски“ денеска се одржа Централниот меморијален турнир во мал фудбал, посветен на загинатите припадници на безбедносните сили на Македонија.
Турнирот е организиран од Здружението на семејствата на загинатите припадници на безбедносните сили „Херои на Македонија 2001–2015“, а на него учествуваа екипи од Министерството за одбрана и Министерството за внатрешни работи.
Министерот за одбрана Владо Мисајловски, преку објава на социјалните мрежи, истакна дека меморијалниот настан претставува начин преку спортот да се испрати порака за единство, почит и сеќавање на загинатите припадници.
„Наша најголема одговорност е да го чуваме споменот на оние кои ја ставија службата кон татковината пред сопствената сигурност“, порача Мисајловски.
Тој нагласи дека зад секое име на загинат припадник стои човечки живот, семејство и лична приказна која, како што посочува, не смее да биде заборавена.
Мисајловски упати порака за зачувување на споменот и почитување на жртвата на припадниците кои ги загубија животите во служба на татковината.
„Да го негуваме нивниот спомен, да ја почитуваме нивната жртва и да не дозволиме нивните имиња и дела да бидат заборавени. Вечна им слава на македонските херои!“, порача министерот.
